ORANJESTAD,Aruba
Miembronan di partido POR ta sostene y apoya e decisionnan tuma door di Gabinete Wever-Croes na e momentonan dificil aki.
Ta trata di decisionnan hopi dificil pa tuma, decisionnan cu ta afecta desaroyo di nos isla, pero cu ta ser tuma pa salvaguardia salud di nos poblacion.
Pa prome biaha nos isla ta den un ‘lock down’, ningun hende por drenta Aruba, pero ta danki na e medida extremo aki nos por bisa cu por contene mas tanto posibel e contagio di Covid-19 entre nos poblacion.
A pidi pa mantene distancia social y pa keda mas tanto posibel cas, otro paso extremo, mas ainda teniendo na cuenta e caracter social di nos hendenan. Pero un biaha mas, ta necesario pa por evita e contagio.
Ciere di tur negoshi pa 8or di anochi no ta algo facil y sigur ta afecta mas ainda e situacion economico-financiero cu nos pais ta pasando aden debi na e ‘lock down’. Pero ta algo necesario.
‘Toque de queda’, algo cu Aruba no a pasa aden pa decadanan, pero otro medida pa controla e situacion.
Tur e medidanan aki banda di e cuarentena pa esnan cu a drenta nos isla prome cu e ‘lock down’ ta dificil, pero na mes momento importante y cu ta demostra un liderasgo admirable unda ta e interes y meta primordial ta e salud di nos habitantenan. E medidanan aki ta conta tambe cu sosten di gremionan na Aruba, cu tambe a pone salud di nos hendenan na prome luga.
Ta mas cu logico cu e pasonan aki tin efecto riba nos famianan, tin di nan a perde trabou, otronan a of lo por bay atras den nan entrada y pa yuda den e situacion dificil aki, Gobierno a pone un fondo di emergencia disponibel, pa na cierto manera por Brinda un poco ayudo financiero na esnan cu ta wordo afecta.
Tambe a conta cu cooperacion di instancianan bancario, FCCA, Volkskrediet Bank y companianan di utilidad cu lo brinda un alivio na tur esnan cu tin mester di dje den e proximo lunanan.
Miembronan di partido kier duna danki na sector publico, KPA, brandweer, DVG, docentenan, transporte publico, esnan encarga cu maneho di desperdicio, na provedornan di comestibel, empleadonan di supermercado, werksters, boticarionan, dokternan, paramediconan, enfermeronan, empleadonan di laboratorio y na tur otro persona cu di un forma of otro ta contribuyendo na e miho porvenir di nos pueblo.
POR como parti di coalicion ta gradici gobierno y tur instancia publico y priva cu a uni pa yuda tur esnan cu tin mester den e temponan dificil aki y ta aplaudi e union cu ta sobresali pa cuida salud di nos población.
Finalisando, miembronan di POR ta pidi tur habitante di Aruba pa nan tambe compronde e gravedad di e situacion y cumpli cu e decisionnan tuma, unda distanciamento social y keda cas ta primordial. “Hunto nos por logra combati e Coronavirus na Aruba”.
