Partido MEP: Mike Eman a dal 3 strike den parlamento

Durante reunion den Parlamento diamars ultimo, por a nota presencia di Mike Eman den sala, despues di un ausencia hopi largo. Eman a hiba palabra y durante su discurso por a nota cu e tabata totalmente desconecta di realidad y tabata papia un cantidad di cosnan incorecto y a dal 3 strike un tras di otro.

Prome strike: Eman a reclama Prome Minister Evelyn Wever-Croes cu no a invita Eman pa dialoga prome cu a bay negocia cu Hulanda. Esaki tabata mentira pasobra aparte di e dialoga y consulta numeroso biaha cu Parlamento, Prome Minister a tene cumbrenan politico cu tur e lidernan politico di Aruba, incluyendo AVP. No un biaha, ni dos biaha, pero tres biaha! Eman nunca a atende na ningun cumbre pero a manda sr. Candelaria represente un biaha, y despues AVP no a participa mas, apesar di a haya invitacion. Pues esaki ta e mentira number 1 di Eman. Strike 1. 

Strike 2: Eman a reclama Prome Minister Evelyn Wever-Croes cu Minister President no a bay negocia cu Hulanda hunto cu Corsou y Sint Maarten. Otro mentira y un biaha mas un muestra con desconecta Eman tawata durante e periodo di Covid. Dia 10 di juli 2020 tur tres prome minister di e islanan den Caribe, a atende Rijks Minsterraad hunto na Den Haag pa protesta e forma cu Hulanda kier a impone e rijkswetnan y pa negocia. Esaki tabata un reunion historico cu tur prome minister di Reino presente den un reunion di Rijks Ministerraad. Pues esaki ta strike 2 di Eman. 

Strike 3: Eman a reclama Prome Minister Wever-Croes cu Aruba a core firma e acurdo cu Hulanda, y asina a forsa Corsou y Sint Maarten pa firma. Segun Eman, Aruba mester a keda sin firma, keda sin haya placa pa yuda esnan den necesidad, pa warda Corsou y Sint Maarten firma. Otro mentira di Eman y un muestra mas di e desconexion y falta di consideracion di Eman cu e dolor di pueblo durante e periodo di Covid. E realidad ta cu Corsou tabata e prome cu a firma dia 2 di november 2020, y Aruba a firma despues, esta dia 13 november 2020. Pues esaki ta strike 3 di Eman. 

Den un solo discurso durante reunion publico den Parlamento, Mike Eman a mustra con desconecta e tawata cu e realidad y a demostra tambe su falta di interes pa nos pueblo durante un crisis mundial devastador, mientras cu e Gobierno di Aruba a maneha e crisis na un forma hopi responsabel y a percura pa tur tres punto cu Mike Eman diamars ultimo a trece dilanti, for di principio di e pandemia. Pero Mike Eman tawata asina desconecta cu realidad, y asina falta di interes den nos pueblo. Mike Eman un biaha mas a sali cu informacion incorecto y mustra con mentiroso e ta. 3 mentira, 3 strike. y tur hende sa cu despues di 3 strike, bo ta OUT! Ki dia Eman ta realisa cu e ta OUT?

Comunicado Partido MEP