Partido Maneho Asertá Visibel i Sigur ta kuestioná i ta kondená aktitut di Minister Zita Jesus Leito kende a deklará públikamente ku Gobièrnu no tin sèn pa drecha e kayanan kibrá.
Partido MAVIS ta di opinion ku un deklarashon asina ta nada mas ku un falta enorme di rèspèt pa e siudadano di Kòrsou pagadó di belasting i ta demostrá otro falta di sintimentu i responsabilidat pa bienestar di e siudadano.
Kayanan di henter e isla práktikamente ta mal kibrá. Nos no ta papia di sker ku kibránan minimal pero burakunan basta hundu den barionan pero tambe riba kamindanan prinsipal di nos isla. E situashon aki a keda neglishá di tal forma ku den varios bario di Kòrsou habitantenan a kuminsá pone hèmber, barí i a planta asta mata pa alertá i pa vehikulonan desviá. Sentenares di usuario di kaya a kibra nan outo den e burakunan hundu aki. Vehikulonan mester kore riba e kaminda kontrali òf riba trottoir pa desviá buraku. E situashon aktual ta e resultado di negligensia di basta aña pero ku a bin empeorá pa motibu di falta di mantenshon.
Partido MAVIS ta di opinion ku e situashon aki no por sigui asina i e deklarashonnan di Minister Jesus Leito no mester wòrdu tolerá. Pueblo tin años ta paga wegenbelasting, impuesto destiná pa ofresé e siudadanonan kareteranan na drechi i seif pa kore ariba. E situashon aktual ta forma no solamente molèster pa usuarionan di kaya, pero más ku esaki e ta forma un peliger pa bida di tantu esnan ku ta den outo komo na pia i e ta un bista mahoso i mediokre pa bishitantenan di e isla.
Partido MAVIS ta opiná ku seguridat di e siudadano na e momentunan aki mester ta primordial i no por warda e baka hoga na pos pa por dèmpel e. Simplemente no por riska bida di hende pa motibu di negligensha di un Gobièrnu. Mester aktua awor promé ku ta lat. Partido MAVIS ta haña ku tampoko mester warda elekshon pasa pa e Gobièrnu nobo tin ku kome e vra ku e Gobièrnu aktual a okashoná. Mester pone e Gobièrnu aktual responsabel pa e desaster ku el a kometé ku nos kayanan.
E situashon lo sigui empeorá i esaki mester keda evitá awe i no mañan.
Partido MAVIS ta un partido ku ta boga pa alsa e nivel di kalidat di nos isla riba tur tereno. Let’s get it done!
