Na nòmber di henter e tim di 22 lider di M21, nos ta yama un danki di kurason na e 984 voto di konfiansa ku nos a risibí den elekshon di 15 di mart último pa asina nos por kontinuá ku e trabou di representá e pueblo boneriano den Konseho Insular. Na di dos lugá un pabien na partido PDB i partido UPB ku nan adelanto den voto. Na partido MPB e señal ta hopi kla, esta ku pueblo no a aprobá e maneho ni di e partido ni di e ekslider, mirando e pèrdida grandi na voto. Na partido 1UPP i partido URB; boso no a alkansá, pero nos di M21 a tuma bon nota di boso mensahe si.
Pueblo a papia i ounke no tin lei pa esaki, étika polítiko i kustumber ta ku e partido ku a optené mas voto lo mester tuma e inisiativa pa kuminsá ku un tanda di kòmbersashon pa orientá posibilidatnan pa haña un mayoria den konseho insular pa por sostené un Kolegio Ehekutivo. I pa ta fuerte nan lo mester bai pa e sosten mas amplio posibel. Pues ta na Partido Demokrat pa tuma e inisiativa aki.
M21 ta respetá desishon di pueblo. Pa loke ta e resultado, nos lo mester sigui ku nos trabou den Konseho Insular i hiba un maneho konstruktivo ku semper e interes general di e komunidat dilanti. Nos lo ta kritiko, nos lo sostené desishonnan na interes general i nos lo rechasá desishonnan ku ta en kontra di e pueblo su interesnan. Tambe nos lo vigila di aserka si ta kumpli ku reglanan di bon gobernashon. Mas aleu nos lo bin ku inisiativanan tantu den forma di moshonnan, desishonnan di raad i tambe inisiativanan di lei pa asina kontribuí na un gobernashon na nivel pa nos isla. Nos ròl di kòntròl riba e forma kon gobièrnu ta manehá fondonan i biennan di e isla aki, pero tambe kon nan ta ehekutá e programa di gobernashon, lo ta intensivo. I pa hasi esaki nos tim di lidernan a komprometé nan mes ku nan lo duna frakshon di M21 den Konseho Insular tur sosten. Nos enfoke pa krea un partisipashon aktivo di komunidat den gobernashon di nos isla, lo kontinuá den un forma strukturá i organisá.
M21 lo sigui konstruí e movementu riba e fundeshi di e 984 votadó, organisando nos mes muchu mas mihó den tur bario aki na Boneiru ku e fe i speransa ku aki 4 aña, pueblo lo rekompensá nos trabou na su bienestar ainda mas i ku nos lo multipliká e kantidat di voto. Nos tin un ekipo hóben, i profeshonal, ku hopi energia i amor pa sigui traha i hasi e diferensia den polítika i gobernashon di nos isla. Si abo tambe ke kontribuí pa yuda hasi e diferensia, aserká i djòin nos ekipo.