Partido Democraat ta konfirmá ku Sr. Dean Rozier a entregá su retiro i a sali for di filanan di e partido kòrá. Su separashon tabata unu di sorpresa pero a tuma lugá a base di rèspèt mutuo i den bon atmósfera.
Partido Democraat ta kanando un proseso intensivo, hasiendo kambionan fundamental, ku e meta pa presentá komunidat di Kòrsou un Democraat Liberal i nobo, ku un tim dinámiko, kapas i konsiente di e situashon serio ku nos pais ta konfrontando. Democraat su konstelashon nobo ta kla pa e próksimo elekshon i pa futuro. Den e prosesonan di kambio no ta tur biá tur hende por haña otro i keda riba mesun liña. Direktiva a hasi su debido esfuerso pa trata na yega na un konsenso entre partidonan, no opstante e partidonan su destino lo ta diferente.
Direktiva ta gradisí Sr. Rozier, den su kalidat komo sekretario di e organisashon i komo parti di e tim di kampaña, pa tur su empeño i esfuerso invertí den Partido Democraat. Nos ta deseá Sr. Dean Rozier tur klase di éksito den su futuro karera, tantu personal komo polítiko. Un danki tambe ta wòrdu ekstendé pa e tantísimo reakshon di komunidat di hende ku a brinda i ta brindando nan apoyo pa sigui dilanti ku e programa Democraat 2021. Na e tim di Democraat tambe danki pa e apoyo profeshonal i inkondishonal. Di e forma aki Partido Democraat atrobe ta subi e tarima polítiko di Kòrsou.
Partido Democraat a hasi un análisis profundo di e situashon di Kòrsou. Nos dushi pais tin hopi potensial, i pa logra ku kada siudadano ta bai partisipá i eksperensiá esaki ta importante pa hasi kambionan nesesario pa yega na resultado duradero pa nos tur. Nos no por keda hasi e mesun kos na e mes manera i pretendé di por kosechá resultado diferente. Partido Democraat a traha un programa strukturá i interkonektá pa atendé ku e problemanan serio di Kòrsou di forma fundamental. P’esei nos ta pidi bo atenshon i prepará pa ban ku e Agènda 21, nos programa di akshon di Partido Democraat pa 2021 i futuro.
Direktiva i Konseho di Partido Democraat ta finalisando e último trámitenan pa anunsiá e lider nobo di Partido Democraat na nos komunidat, huntu ku e lista di kandidatonan i e programa di akshon ku ta bai mustra kon mester atendé ku e retonan ku nos pais stimá ta enfrentando.
Den 2021 Partido Democraat ta bai pa kambio! Ban pa e transformashon. Sigui nos riba Facebook pa bo ta bon informá.
