Partido Curpa ta na altura cu lidernan religioso lo bay reuni cu nos prome minister. Nos no ta kere cu mester perde tempo den un reunion asina paso no ta prome biaha cu nos promer minister ta duna su palabra y no ta cumpli. Nan reunionnan cu gobierno pero nunca nan a duna un resultado faborable pa pueblo. Si ni acuerdonan firma e no a ehecuta. Punto 5 di metanan di desaroyo sostenibel Agenda 2020 ta papia di igualdad di genero. Partido raiz for di un principio a laga sa caba cu nan ta na fabor di e matrimonio aki. Nos sa cu nos minister di economia ta motor tras di metanan di desaroyo sostenibel. Pueblo no mester lubida cu dia 1 di maart 2021 un total di 17 parlamentario a grita voor pa “geregistreerd partnerschap” y nan tabata sa e consequencianan.
Unicef ta forma parti di e metanan di desaroyo sostenibel. Nan ta hasi uso di unicef pa infilta e enseñansa di genero na nos scolnan. Awe den 2022 locual partido Curpa a spierta pueblo a bira realidad. For di 2016 nos di partido Curpa a bin ta informa pueblo di e plannan diabolico aki pero pastornan Cristian ta prefera di duna stemadvies pa vota pa partidonan mep y partido avp y asina desvia cristiannan for di principionan di Dios.
Diasabra cu a pasa pastornan a reuni cu parlamentarionan Tevreden, Berlis y Hoek riba e tema di matrimonio di mesun sexo. Hof a dicta un sentencia cu gobierno mester hinca e matrimonio di mesun sexo den nos codigo civil. Nos por mira cu Hof no ta respeta nos leynan y ta sinta riba stoel di Parlamento di Aruba. E argumento cu e matrimonio di mesun sexo no ta bai di acuerdo cu nos cultura, tradicion, religion y naturalesa no ta valido y no ta cuadra. E hueznan di hof a falta nos pueblo respet pa bin cu un argumento asina. Huez unilateralmente ta dicidi pa henter nos comunidad di Aruba,Korsou y BES eilanden. Huez no ta bai contra e sentencia di Straatsburg di Europese Hof.
Locual cu nos di partido Curpa ta kere cu mester pasa ta cu e 3 parlamentarionan menciona, si nan tin e corahe, yama un reunion di Parlamento cu caracter di urgencia y pidi pa un referendum den 90 dia. Si ripara cu e president di Parlamento no accede pa yama e reunion, anto e ora Tevreden, Berlis y Hoek mester saca nan conclucion si nan lo sigui sostene e gobierno den su maldad. Pueblo no mester lubida cu dia 1 maart 2021 Tevreden y Guedez tabata sa di antemano cu parlamentarionan lo vota voor pa geregistreerd partnerschap y nan a laga e ley wordo trata den Parlamento cu e resultado conoci. Pueblo di Aruba mester realisa cu e cos aki lo djies e cuminsamento. Nos a spierta pueblo differente biaha cu e cos aki ta drenta nos enseñansa y awor e ta na nos scolnan. Pronto e ley di transgender lo bin riba mesa y lo mester wordo trata den nos Parlamento y tambe e ley di Corona cu lo kita nos libertad. Esaki ta leynan cu mester yuda e metanan di desaroyo sostenibel haya su forsa.
Si un parlamentario bisabo cu e no sa e contenido di puntonan ancra den Sustainable Development Goals anto e ora ey e ta gañabo. E metanan di desaroyo sostenibel ta pa yega na e gobierno diabolico mundial. P’esey nos ta vocifera cu un Cristian no por forma parti di un partido politico cu ta sostene un gobierno den su maldad. E metanan di desaroyo sostenibel ta pa 2030 bo no tin libertad mas sino bo ta bira un catibo. Nos por corda cu dia 23 di September 2022 parlamentario Kamperveen a hisa e bandera di e metanan di desaroyo sostenibel recordando e di 7 añanan cu Aruba ta forma partido di e agenda aki. Ela cuminsa 23 di September 2015 cu gobierno di avp y awe mep, raiz y avp a brasa otro den e Metanan di Desaroyo Sostenibel cu ta hasi nos catibo di un plan diabolico.
Partido Curpa for di principio ta contra di un gobierno cu ta bin cu leynan di hende cu ta bay contra leynan di Dios. Pueblo mesun cos cu Dios a bisa Moises pa aparta for di Core pa via di su maldadnan awe nos ta bisa pueblo pa aparta for di e gobierno diabolico aki. Nos speransa lo keda den Dios paso nos ta convensi cu Dios lo bay hasi algo den e dianan nos dilanti.