Pueblo di Aruba a cuminsa sinti e aumento barbaro riba awa y electricidad. Tin aumento caba riba prijs di comestible y esaki ta un otro carga mas. E 3% di aumento riba pensioen ta manera carga un glas di awa hiba lama. Mundialmente nos por mira e gobiernonan socialista/comunista ta masacra nan mesun pueblo.
Pueblo a cuminsa mandanan gobiernonan socialista/comunista manera Sri Lanca, Italia, Suecia, Inglatera y Lituania paso pueblo a cansa di gobiernonan socialista. E gobiernonan aki ta tambe cu e plan global di bin cu un gobierno mundial. Nan plan a fracasa y nos por mira pronto paisnan manera Alemania, Francia, Spaña y Hulanda cu tambe tin gobierno socialista lo bay cas. Union Europeo ta mal para. Europa ta den recession y ta papia di economia di Europa completo. Tin 2 palabra cu ta bin continuamente door di periodistanan pa dilanti cu papia di frieuw y hamber. Kier forsa pueblo pa baha man riba consumo di electricidad den tempo cu invierno ta bay drentando.
Aruba ta pertenece na paisnan cu inflacion mas halto cu tur otro caminda paso tur cos ta importa. Mundialmente fleta di container a aumenta mas cu 100% y nos por mira cu material di construccion a aumenta cu 300% pa 500%. Awor nos por tende cu tin un otro gate mas cu tramite di asilo politico. Ta busca moda di colga directornan pero warda e boemrang paso e ta bin sigur. Un ministro cu tin 3 differente instancia a entrega keho penal contra di dje. Ela corre bay den exterior riba un engaño di ta bay pidi permiso na Merca pa negocia pa haya heavy fuel oil mas barata pero lubida di pidi permiso na Reino Hulandes. Riba dje por a lesa cu e minister aki no sa unda su cara ta para paso no a busca conseho di expertonan di WEB N.V. Na hulandes tin un dicho cu ta bisa: “Hij heeft de klok horen luiden maar weet niet waar de klepel hangt”.
Si nos promer minister laga pueblo mira tur e rapportnan di mal maneho unda gobierno tin un dikke onvoldoende anto e ora ey pueblo lo haya sa unda tur e corrupcionnan ta pero gobierno tin nan bon scondi bao di su brasa pa pueblo no haya sa e berdad. E gobierno aki ta kibra di paden. Un cos ta sigur e gobierno no por usa e palabra integridad. Ta cuestion di tempo pa mira ken lo ranca e plug di rosea di e coalicion aki y pa despues tira e culpa riba e otro. Ademas tin e decreto di reino riba mesa.
E pueblo di Aruba a vota tradicionalmente pa hopi aña y esaki ta locual cu nos ta cosecha locual nos a vota p’e. Ora nos vota pa un gobierno cu no ta kere den Dios y cu no tin respet pa leynan di Dios nos situacion lo no cambia. Si no tin Dios den nos gobierno lo nos tin husticia di Dios. Nos por tin e hendenan mas sabi den nos gobierno pero si no tin temor di Dios nos lo sigui den mesun circulo vicioso. El Salvador ta un ehempel di un pais di mas violento den Centro America pa un pais di paz y progresso. Awe nos tur ta sufri pa via cu nos tin un gobierno inhusto y ta trapa ariba pueblo manera ta haya ta bon. P’esey mes pueblo di Aruba si nos kier mira cambio nos mester vota pa un partido cu tin temor di Dios. Partido Curpa ta e unico cu a y ta para pa leynan di Dios. Pa nos pais progresa nos mester tin Dios den nos gobierno y husticia lo prevalese.
