Den parlamento a trata e ley cu finalmente ta duna Minister di Husticia y Asuntonan Social Rocco Tjon e luz berde pa por ehecuta e proyecto di ex-codemsa, cual pronto lo bay wordo comberti den un centro di husticia, caminda lo bay ubica diferente departamentonan hudicial hunto bou un solo dak. Aunke cu a inicia cu e proceso aki di algun tempo atras, tin un motibo pa cual e ley a tarda un poco pa wordo aproba, esaki pa motibo cu e la wordo adapta completamente, mirando cu e proyecto a nace for di ex-minister di Husticia Sr. Bikker durante Gabinete Wever-Croes I. E adaptacion ta ensera cu mas departamento lo bay wordo ubica akinan hunto cu otro departamentonan cu no tabata tin un luga fiho pa traha.
Banda di esaki, a percura mesora pa tin funcionalidadnan adicional pa por surpasa cierto retonan. Asina por bisa, cu lo bay tin un cellen complex cu lo bay wordo ubica na e edificio, tambe lo bay tin un centro di “real-time intelligence”, y ta bay tin un espacio special pa arma y municion segun standardnan internacional. Tambe, ta bay tin un espacio special pa “in bewaring en in beslag genomen voorwerpen”, segun normanan internacional. Pues ta trata di un proyecto completamente nobo, algo cu Aruba nunca a yega di conoce, y ta un beneficio sigur pa Cuerpo Policial di Aruba. Otro motibo pakico a tarda pa e ley aki pasa ta cu, a pasa door di un proceso riguroso, caminda a busca “draagvlak”. Asina por bisa cu a sinta cu tur e departamentonan y e sindicatonan pa nan sa kico e edificio aki ta bay bira, a tene cuenta cu e programa di rekisitonan y a base di esey a yega na un plan di structura y un “vlekkenplan”. Awo cu poderacion di Parlamento di Aruba, cu a vota unanimamente na fabor di e proyecto aki, lo tene cuenta cu ehecucion di e proyecto.
Te ainda ta calcula cu pa e prome kwartaal di otro aña, e preparacionnan final lo keda cla hunto cu tur e stakeholders, y pa e di dos kwartaal e “aanbestedingsprocedure” lo inicia, cual lo ta completamente den man di APFA. Construccion lo por cuminsa den e di tres kwartaal di otro aña, cual lo tin un duracion di un aña, pues por calcula cu e proyecto aki lo ta completamente cla pa final di aña 2024. E departamentonan cu lo bay wordo ubica akinan lo ta Bureau City Inspector, Inmigracion Aruba, CEA y KPA.
Por ultimo, e mandatario a indica cu, e edificio aki lo tin su beneficionan, cuminsando na e hecho cu ta bay paga menos “per vierkante meter”, pero ta bay tin condicionnan di trabou completamente nobo, mirando cu tur cos ta bay ta nobo den e edificio. APFA lo bay inverti entre 10 pa 12 miyon florin, y banda di esey e prijs di huur den su totalidad ta bay ta menos “per vierkante meter” compara cu loke pais Aruba ta pagando actualmente pa cada departamento. Pues un tremendo proyecto na final di dia, cu lo mira su frutonan.
