Parlamentario Yung ta felisitá Minister Van Heydoorn ku digitalisashon di ministerio OWCS

Demas ministerionan mester sigui ehèmpel

Parlamentario pa frakshon di MFK, Ramón Yung ta felisitá Minister di Ensen1ansa, siensia, kultura i deporte, Sithree van Heydoorn ku digitalisashon di su ministerio. Digitalisashon dje ministerio di OWCS mester sirbi komo ehèmpel pa demas minister sigui e paso di digitalisashon aki.

Tabata djabièrnè último ku Minister di enseñansa, siensia, kultura i deporte a organisá un konferensia titulá “Topa mi riba e ruta digital”. Durante e konferensia, minister van Heydoorn a presentá e tim kompleto ku a traha riba e trayekto di digitalisashon. Alabes a presentá tur demas organisashon i demas koleganan di entre otro SSO-IT ku a duna un tremendo aporte den planifikashon i ehekushon dje trayekto di digitalisashon.

Personal dje Ministerio di enseñansa, siensia, kultura i deporte ya a keda ekipá ku entre otro lèptòpnan nobo, komokiera ku mayoria dje ekipo ku e personal tabata realisando nan trabou diario kuné ta antikuá i no tabata por akoplá riba e sistema nobo.

Ku e ekiponan nobo, awor e personal por traha den nan ofisina di trabou, pero den kaso ku nan mester traha for di kas i of asta for di den eksterior, esei lo ta posibel i sin niun klase di problema.

A krea un “dashboard” riba kual, primiendo un kònòpi e usuario por disponé di informashon al dia, manera entre otro e kantidat di skol ku tin na Kòrsou, e direktiva di skol bou di kual kada skol ta kai, e kantidat di alumno ku ta bishitando e skol, e sekso di e alumnonan ku ta bishitando e skol, e nashonalidat dje studiante, si ta trata di un studiante migrante irregular i asta si ta trata di un studiante ku ta dispone di transporte di skol.

Tambe riba e “dashboard” por haña informashon dje kantidat total di studiante ku tin na Kòrsou i den kaso ku ta trata di un skol na nivel SBO, por mira eksaktamente ki tipo di studio e studiantenan ta siguiendo. Por ehêmpel por a mira ku aktualmente, teniendo kuenta ku lokual merkado ta eksigí, tin un kantidat grandi di studiante na nivel SBO ku ta siguiendo e kurso di kòki.

Ku e proseso di digitalisashon aki segun Minister van Heydoorn a splika, por traha riba un maneho den sektor di enseñansa ku ta muchu mas dirigí riba e demanda di sierto profeshon ku tin riba merkado laboral.

Banda di esaki e datonan disponibel ta brinda e ministerio informashon al dia ku di un manera rápido i efisiente, por tuma desishonnan na momentop ku esaki ta nesesario.

Den e proseso ku ta kanando, a digitalisá e área di enseñansa, pero pronto lo sigui ku e proseso pa digitalisashon dje área di deporte i kultura pa kual ainda mester aloká e medionan finansiero nesesario.

Parlamentario pa frakshon di MFK, Ramón Yung ta aploudí e inisiativa di Minister van Heydoorn ku henter e proseso di digitalisashon i ta spera ku demas ministerio lo sigui e proseso i paso di inovashon aki, di manera ku den futuro serkano e aparato públiko den su totalidat por ta digitalisá. Esaki sigur lo kontribuí na un funshonamentu mas optimal di manera ku por brinda servisio di forma muchu mas efisiente na komunidat.