Parlamentario drs. Mervin Wyatt-Ras tabata den bijeenkomst no. 19 cu e tema “Toelichting door de MinAZ op voorstel van rijkswet Caribisch Orgaan Hervorming en Ontwikkeling (COHO) en advies Raad van State terzake”. Durante e encuentro aki e ex-ministro Presidente a bin duna informacion encuanto e organo Caribense pa Reformacion y Desaroyo. Evelyn Wever-Croes pa motibonan oportunista a bai gobernador pa entrega su responsabilidadnan pa pais Aruba, pa e no para responsabel pa loke ela firma y entrega nos autonomia. El a usa e asunto di e Fundacion di POR so como excusa pa benta gobierno abou. Pero un ta e mes ta traha cu esnan cu e mes a yama pa corupto? Desde inicio e gobierno aki no a traha manera mester ta. No a haci mucho pa pais Aruba. No a drecha niun skol, no a mehora infrastructura, no a drecha niun cas di FCCA, no a baha prijs di comestibles, no a baha prijs di awa y coriente, no a baha edad di pensioen manera a priminti, no a crea mas espacio den cartera di nos ciudadanonan, a pone maestronan den stress dor di cambionan descabeya sin consulta. A corta den cuido cu 5 miyon pa anja y a entrega Aruba su autonomia na Hulanda, a cambio di un par di luna di placa. Evelyn a bai di acuerdo pa pasa 2 Rijkswet, esta COHO y Rijkswet Aruba financieel toezicht (RAft) y e acuerdo cu ela firma pa castiga nos pueblo cu medidanan den e landspaketten. Pero ta hopi obvio cu Evelyn-Wever Croes manera semper ora cusina bira cayente e ta core bai. Paso a sali na cla cu e tabata na haltura di e conseho devastador di Raad van State pa loke ta trata e Rijkswet COHO. Secretario di Estado Knops a declara cu a delibera cu e islanan tocante e conseho aki di basta tempo caba. Pues Wever-Croes tabata sa pero a keda keto. El a ganja pueblo. Esaki ta obvio awor.
Wever-Croes a anuncia Campanja tres luna pasa, a bin cu logo nobo den pleno pandemia y ora cu el a ripara cu e no por a drenta cas di ciudadanonan pa campanja, paso nan ta core cun’e, el a warda pa haya un excusa pa por disolve e gobierno. Aki e ta mustra su incapacidad y esun di su gobierno pa traha hunto. Aki ta keda demostra cu interes personal ta mas importante p’e cu esun di nos pueblo. Wyatt-Ras durante e reunion a puntra pa haya splicasion di e conseho di Raad van State riba COHO y dicon Wever-Croes a keda den silencio tocante e conseho. Tambe a cuestiona e hecho cu COHO lo investiga personal den servicio di gobierno. Wyatt-Ras a cuestiona ademas cu un cantidad di empleadonan te ainda no ta haya FASE, locual a cai den mal tera serca di e minister. Tambe el a cuestiona e agilisacion di ontslagprocedure pa facilita cu trahadonan por ser kita foi trabou mas facil y el a haci pregunta encuanto e reforma fiscal. Ta lastima cu e ex-gobierno dysfuncional no por a keda profesional ora di contesta pregunta. Igualmente cu Ady Thijsen cu te ainda no a compronde cu e mester ta neutral den su trabou y no tuma parti pa gobierno.
Ta keda un hecho cu a disolve gobierno prome cu nan por a entrega e presupuesto na Parlamento. Esaki despues di 7 luna cu e presupuesto mester a wordo entrega segun nos Constitucion.
Awor ta ganja cu ta para pa integridad mientras tur hende sa cu pa motibo di otro argumentonan a disolve e gobierno. AVP si lo rescata nos pueblo. Den dialogo cu pueblo lo renegosha cu Hulanda y trece prosperidad bek den tur hogar.
