Parlamentario Mervin Wyatt-Ras a trece padilanti cu a trata e ley encuanto di construcion y sloop di edificio den sala di parlamento. E ley aki ta un otro medida riba nos cuidadanonan. Netamenta awor den un situacion dificil ta bin cu restriccion y sancionnan pa nos hendenan ora nan construi na forma indesea.
Wyatt-Ras no ta contra reglamentacion ni maneho dirigi riba edificionan pero netamente awor cu un cantidad di nos hendenan a perde nan hogar y tin di nan ta construi algo tanten na un familiar pa haya un posada ta bin cu e ley aki cu ta pone tambe personanan pa controla y duna dwangsom sin cu gobierno a contesta preguntanan di Wyatt-Ras cuanto e dwangsommen nan ta.
E ley ta duna Director di DOW cierto bevoegheden of autoridad pa sanciona, dor di cual e minister cu ta finalmente responsabel pa DOW por skonde tras di carson di e director.
Wyatt-Ras ta menciona cu segun Raad van Advies e ley ta crea “versnippering”, no tin concordancia cu otro paisnan y ta bin cu boet, sancion y bestuursdwang, cualnan ta medida riba nos hendenan.
Segun Wyatt-Ras e ley ta curu. Ta necesario “invoeringsverordeningen” y MB’s pa e por funciona. Riba pregunta di Wyatt-Ras si tin un plan y ki tempo lo implementa e ley tampoco e no a haya contesta.
Wyatt-Ras a puntra tambe si Parlamento por ricibi raport o relato di consulta cu esnan envolvi encuanto di e ley y tampoco no a ricibi esaki. Segun e minister si tabatin consulta y ora traha e MB’s lo consulta cu stakeholders.
Raad van Advies no ta di acuerdo cu contenido di e ley: “de Raad kan zich weliswaar met de doelstelling doch niet met de inhoud van het ontwerp verenigen en geeft u in overweging het niet aan de Staten aan te bieden”
E ley ta duna e minister e autoridad pa duna e “toezichthoudende” ambtenaar of e ambtenaarnan cu ta supervisa ehecucion di ley e autoridad pa drenta hogar di cuidadanonan.
Si e ambtenaarnan aki haci algo cu no ta corecto of “onrechtmatig” kico ta haci y unda por keha. Riba e pregunta aki no a haya contesta. Segun Wyatt-Ras tin cu respeta derecho humano y privacidad di cada cuidadano prome cu drenta zomaar den nan hogar pa controla y den e ley aki no ta manera den otro ley cu Huez comisario of PG ta duna e ambtenaar e autoridad, sino e minister, kende ta un politico.
Aki Wyatt-Ras a expresa su preocupacion cu e minister, kende ta politico, por haci mal uso di su influencia pa perhudica un persona cu no ta na su agrado of no ta pertenece na su color politico. Esaki lo fortifica e fenomeno di faboritismo, di friends and family y nepotismo.
Sinembargo e minister no a tene cuenta cu e remarkanan aki.
E hecho cu pueblo lo tin cu paga un dwangsom lo ta otro medida. Kier piki pluma foi un galinja cu ya no tin pluma.
Den e ley ta describi tambe registracion cual ta bai yuda pa haya sa ken ta ken y por ser usa pa tuma represaille riba hende.
Ariba e pregunta cuanto implementacion lo costa pais Aruba no a haya contesta tampoco.
Wyatt-Ras no a haya corecto cu den e reunion aki atrobe miembronan di Parlamento di fraccion di MEP no ta bin cu nada nobo sino ta djies skucha kico otro ta papia pa nan reacciona riba kico Wyatt-Ras y otro coleganan ta trece den Primera tanda. Si e Presidente sa su trabou e mester coregi y stop nan paso den primera tanda e parlamentario no por referi nan loke otro colega trece dilanti. A bira un modus operandi cu esnan cu ta defende gobierno no kier pa oposicion menciona conseho di Raad van Advies. Pa nan e ta parse di ta un gran ofensa. Pero hecho ta cu dor cu e gobierno aki no ta transparente ni ta duna informacion ni documento, oposicion ta depende di conseho y remarcanan di Raad van Advies pa por haci oposicion.
Wyatt-Ras ta lamenta prioridadnan robes di gobierno cu di un banda ta bin cu formanan di pluma nos cuidadanonan humilde pero di otro banda ta keda gasta placa y aumenta nan post di goederen en diensten pa beneficionan propio.
Wyatt-Ras a base di tur loke ta menciona, hunto cu su fraccion no por a duna sosten na e ley di construccion y sloop di edificionan.