Diasabra 15 di juni 2024, hunto cu mi famia, mi a asisti na e clausura di Weganan Escolar
2024 na Joe Laveist Sport Park na San Nicolas. Nos por a gosa di diferente wega di futbol
entre scolnan preparatorio di mucha y mucha homber y tambe di un bunita show di baile di
NTG & NLG dirigi pa Marisol Peña. Un bunita clausura yena di competencia y apoyo
escolar y familiar. Un anochi cu ta culminacion di 2 siman di Weganan Escolar (WE) cu
tabata exitoso.
Desaroyo WE
Banda cu mi ta hopi contento cu ta percura pa continuacion di WE tur aña y cu ta motiva
cada biaha pa mas scol participa, mi ta encanta e Hecho cu cada aña ta keda desaroya e
weganan. Banda di competencia deportivo den diferente ramo di deporte, e aña aki nos por a
wak cu tabatin WE baile y WE Mente y Kids Athletics. Desaroyonan hopi interesante y
positivo. Mas scol y mas mucha participando y asina tambe ta logra inculca e gana pa haci
deporte di chikito den nos muchanan. Algo sumamente positivo y necesario. Sigur mirando
cu mediante di deporte y baile nos ta brinda nos mucha y hobennan momentonan di desaroyo
completo, trahando riba nan habilidad di traha den equipo y aspectonan manera
comunicacion, dialogo, strategia, planifica, determinacion y mucho mas. Mi ta haya e
weganan aki asina importante. Nan no ta solamente 2 siman di competencia pero e weganan a
cuminsa di september aña pasa te cu comienso di mei e aña aki y e finalnan a ta tuma lugar
durante e dos simannan tras di lomba.
Banda di esaki e weganan ta crea union, ta crea momento pa famia y scol bini hunto. Un
ambiente total yena di competencia y apoyo.
WE 2024
E aña aki un total di 1300 alumno di 45 scol preperatorio, basico y secundario a participa na
WE 2024 y a competi contra otro den diferente disciplina, entre otro beach tennis, volleyball,
futbol, y badminton.
Na Kids Athletics, cu ta un actividad organisa pa IBiSA hunto cu e maestronan di movecion
y salud, a participa en total 8 scol. E parti di WE aki ta uno hopi importante y ta siña e
muchanan entre otro mobilidad y coordinacion.
Na WE Baile a participa tambe ocho scol preparatorio, special, basico y secundario den seis
(6) diferente categoria. E aña aki a introduci un categoria nobo, unda e maestronan tambe a
participa den e concurso di baile. E alumno- y maestronan a demostra nan talento y
creatividad durante e evento di baile cultural, moderno y deportivo. E parti di WE aki ta siña
nos mucha y hobennan un forma emocionante y social di keda activo. WE Baile ta brinda e
mucha- y hobennan di Aruba e oportunidad pa desaroya diferente habilidad y ta contribui na
nan formacion total. Di aplaudi e anochi aki ta cu a rindi homenahe na Sr. John Freddy
Montoya. Sr. Montoya a ricibi un bunita presentacion dedica na su honor durante e anochi aki
pa su aporte enorme na WE y actividadnan cultural en general.
E aña aki pa prome biaha a organisa WE Mente. Mi a compronde un actividad cu a keda
gusta masha y cu sigur a duna WE un otro dinamica. Un tremendo ampliacion di WE. Hunto
cu Futura nan a logra haci WE Mente algo moderno y ‘cool’ pa tur hoben y esnan presente.
Temanan cu a wordo uza durante e competencia ta conocemento over schoolsport, deporte en
general, salud, movecion y Premio Excelencia den Deporte.
Mi a encanta con a uniforma e scolnan un biaha mas y tambe nos coach y refreenan. Alabes
mi a haya un tremendo idea pa a incentiva e scolnan pa hisa bandera di Aruba y esun di nan
scolnan, y canta himno parti mainta (maske ta 1 biaha pa siman). Tremendo idea mes. Sigur
no por laga afor con WIWI tabata pasa cu yen di entusiasmo e aña aki, bishitando scolnan,
apoyando mucha y hobennan y creando ambiente. Overall un WE hopi exitoso y tremendo
desaroyo.
Gradicimento y felicitacion
Pa WE por tabata exitoso e aporta y dedicacion di tur scol participante, nan cabesante,
docente, studiante y mayornan tabata esencial. Mi ta aplaudi y gradici nan pa tur nan esfuerso
y energia pa pa haci WE un exito total. Mas cu claro mi kier felicita tur participante y ganado
di diferente categoria di WE (sport, baile, mente y athletics).
Y por ultimo mi kier felicita y gradici e team completo di IBiSA cu a traha masha duro mes,
Minister Endy Croes y Ministerio di Enseñansa y Deporte, Gabinete Wever-Croes II,
Fundacion Lotto pa Deporte (FLPD), Stichting Sportsubsidie Aruba (SSA), Utilities Aruba,
SETAR NV, Aruba Airport Authority NV (AAA) y Aruba Investment Bank (AIB) cu a haci
e Weganan Escolar 2024 posibel y uno sumamente exitoso.