Pa cuminsa mi kier gradici Fundacion Autismo Aruba FAA pa nan invitacion pa mi por a
participa na nan forum politico Ban Papia Inclusion pa Eleccion cu a tuma lugar
diadomingo 24 di November 2024. Aalabes mi kier a felicita e dos hoben adulto autista,
Byron Lesire y Kay Quandus kendenan a modera e forum y a haci un tremendo trabou. E
meta e forum politico tabata pa brinda personanan neurodiverso y nan famia e oportunidad pa
scucha kico diferente politiconan kier logra pa e grupo aki den e siguiente gobernacion.
Durante di e forum mi accentua cu den nos Programa di Gobernacion 2025-2029 nos ta sigui
subraya e importancia pa yega na un comunidad unda tin oportunidad pa desaroyo igual y
husto pa tur persona. Ya caba nos a bin ta duna atencion special na esaki y realisando e
inversionnan necesario den por ehempel Departamento di Mucha y Hoben pa loke ta trata
early intervention pa muchanan cu autism. Pa brinda un mihor servicio den cuido nos a
aumenta e subsidio di Respaldo cu 6 miyon florin, di Stichting Hunto cu 2,7 miyon florin, y
tambe nos a introduci coverage di Logopedie via AZV. Sigur nos no ta unda nos kier y
mester ta, pero realidad ta cu no ta placa so ta hunga un rol pero e scarcedad di e
profesionalnan necesario tin su impacto negativo y riba e aspecto aki sigur nos lo sigui traha.
Durante e forum mi a trata e 2 accion specifico cu nos ta trahando riba dje pa por brinda
sosten financiero na e grupo meta aki y nan famia.
Adaptacion Landsbesluit Bijstandsverlening
Mi a indica cu mi lo sigui monitorea y pusha pa e trabounan cu ta tumando lugar pa loke ta
trata adaptacion di e Landsbesluit Bijstandsverlening keda finalisa y bira un realidad. E
intencion ta pa amplia ken nan ta cay bou di e landsbesluit aki, cu otro palabra amplia e
cantidad di categoria, esta tipo di limitacion, caminda lo incorpora personanan cu un trastorno
di desaroyo. Alabes MEP lo kier kita e limitacion di edad existente pa cual por aplica pa e
bijstand aki cu awor ta 16 aña. Recientemente nos a percura pa hisa e suma pa esnan cu ta
ricibi e bijstand aki cu 130 florin y nos lo sigui traha pa aumente aun mas, tanten cu esaki ta
responsabel y nos presupuesto por carg’e.
Income and expenditure survey como base pa introduccion di subsidio
Adicionalmente mi a trata e echo cu abase di e income and expenditure survey cu CBS ta
ehecutando intencion di MEP ta pa introduci diferente tipo di subsidio mediante cual entre
otro por brinda sosten financiero na famianan cu un persona cu tin un trastorno di desaroyo.
Como partido nos a demostra cu echos cu nos ta traha pa e grupo meta aki, y ta trahando
ainda pa realisa proyectonan na nan beneficio y progreso. Porta no mesun liher cu ta desea
pero tin knelpunten cu nos no por soluciona mesun facil cu nos ta desea. Mester enfatisa cu ta
keda un reto pa nos haya e profesionalnan necesario specialisa y por duna e cuido y sosten
dirigi na e grupo meta. Cu bo sosten nos lo por sigui ehecuta e proyectonan pendiente pa
2025-2029.
Parlamentario Shailiny Tromp-Lee ta felicita Fundacion Autismo Aruba cu nan forum politico Ban Papia Inclusion pa Eleccion
