Diahuebs ultimo Minister di Enseñansa, sr. Endy Croes, a keda invita pa mi persona, como presidente di Comision Fiho di Enseñansa di Parlamento, pa bin presenta e rapport encuanto maneho integral di idioma.
Lo ta bon pa menciona cu dia 1 di april 2022 Minister Croes a bin presenta e “Doorlichtinsrapport”, den cuadro di Landspakket, pa loke ta trata enseñansa na e comision menciona. Dia 13 di oktober 2022 tabatin un encuentro publico caminda Minister President a bin cu tur “trekker” di cada tema di e landspakket caminda un update general a keda duna na Parlamento. Durante e reunion aki caba mi persona a trece padilanti cu mi ta haya na su lugar pa den comisionnan nos invita e diferente trekkernan pa nan bin duna informacion mas detaya. Durante tratamento di presupuesto, dia 8 di november 2022, Minister di Enseñansa a informa cu e rapport pa loke ta trata maneho di idioma lo ta cla na december 2022 y pa es motibo e la keda invita pa bin haci un presentacion na Comision Fiho di Enseñansa asina aña a habri.
Durante e reunion di diahuebs ultimo Minister a keda acesora pa Directora y profesionalnan di Departamento di Enseñansa. E trabounan pa loke ta trata e creacion di un maneho integral di idioma ta resorta bou e Coordinatiegroep Taalbeleid cu ta cay bou coordinacion di sra. Scholing-Pietersz di Departamento di Enseñansa. Sra. Scholing-Pietersz ta esun cu a haci e presentacion di e proceso encamina, e resultado di esaki y consehonan final.
E proceso encamina tabata uno amplia caminda a sinta cu tur stakeholder relevante, en total 52 a keda consulta. Resultado general di e proceso encamina pa loke ta trata e maneho di idioma den enseñansa ta entre otro:
- tin apoyo pa maneho multi lengual den enseñansa cu rol pa Papiamento, Hulandes, Ingles y Spaño
- Ta conclui cu enseñansa actual no ta conecta cu e necesidadnan di: mercado laboral, enseñansa secundario/vervolgonderwijs y competencianan basico necesario pa cada cuidadano por ta autosuficiente aki na Aruba.
Basa riba e resultado e Coordinatiegroep a presenta algun consehonan final cu lo mester trece e mehoransa necesario den nos enseñansa cual mester brinda nos mucha y hobennan mihor perspectiva educacional y pa nan por ta exitoso den bida.
Pa maart 2023 Gobierno mester tuma un decision encuanto e maneho di idioma den enseñansa. Alabes mester stipula e financiamento di e decision cu lo keda tuma y sigui na stipulacion di e manera con ta bay implementa e decision tuma. Decisionnan cu mester keda tuma ta multiple pero sigur uno hopi importante ta ecuanto di nos lenga materno Papiamento, esta si ta cuminsa cu alfabetisacion na Papiamento den eerste klas y como idioma di instruccion den scol primario (y su desaroyo). Poco poco nos mester yega na e culminacion di un discucion cu nos a bin ta hiba pa añas. Nos no por keda papia di e problema so, a bira ora pa tuma decision. Decision na bienestar di nos mucha y hobennan.
E reunion a bay den bon ambiente, caminda hopi pregunta a keda haci y contesta. Siguiente reunion lo ta pronto caminda Minister lo bin duna un update di e doorlichtingsrapport, decisionnan al respecto y kico ta bin next.
