Diamars ultimo dia 18 di oktober 2022, dia nacional contra traficacion di hende, mi a asisti na lansamento di e pakete educativo riba e topico di traficacion hende. Un pakete special pa studiantenan di scol secundario di 12 pa 18 aña. Manera cu a keda accentua durante e atardi aki, na Aruba tambe nos tin casonan di ‘mensensmokkel y mensenhandel’ y pesey mes nos mester duna e topiconan aki su debido atencion. E pakete ta forma parti di e campaña ‘Habri bo wowo’, cu a inicia na 2021 y cu nos por sigui via www.habribowowo.com, rednan social (Facebook, Instagram), radio y corant.
Cu e pakete kier logra aumenta e conocemento y consciencia riba e temanan. E ta pa siña nos pa habri nos wowo y alabes pa conscientisa cu hunto nos por combati e trafico ilegal di persona. Y con mihor pa haci esaki cu door di incorpora e topico den nos curiculo escolar y brinda e formacion necesario na nos hobennan.
Mi ta termina cu palabranan di gradicimento y felicitacion na un y tur cu a haci esaki posibel, principalmente CMMA.
