Recientemente, como Presidente di Comision di Enseñansa, mi a invita Minister Endy Croes
pa un reunion pa nos trata con inicio di aña escolar nobo ta bayendo y tambe pa e duna un
update di diferente proyecto cu ta andando of ta den tapara. Mi mester bisa cu Minister su
presentacion ta refleha logro y desaroyonan positivo y importante pa enseñansa aki na Aruba.
Mediante e comunicado aki mi ta elabora riba 2 di nan y lo sigui trata algun otro den
siguiente comunicado.
Aumento normbedrag pa scolnan
Mi mester bisa cu reunion a bay hopi bon caminda Minister Croes a cuminsa na trata e parti
di aumento di normbedrag cu ta un logro hopi grandi pa nos enseñansa. Como Parlamentario
mi a sostene e decision di Minister pa aumenta e normbedrag y a aproba e suma
correspondiente pa por realisa esaki. Normbedrag ta e compensacion cu scolnan ta ricibi
atraves di “exploitatiesubsidie” pa cubri diferente gasto di y den enseñansa manera gasto di
mantencion, lesmateriaal, inversion den material di desaroyo, utilidad, mantencion di mueble
di e scolnan y limpiesa di edificio y lokaal. Ultimo biaha cu a aumenta e suma aki tabata na
aña 2010. Ta despues di mas cu 13 aña un gobierno ta ahusta e normbedrag aki cual nos
mester realisa ta hunga un rol hopi importante riba e desaroyo y calidad di nos enseñansa.
Pesey mes mi ta aplaudi e empeño y prioridad duna door di Minister Endy Croes pa loke ta
trata e topico specifico aki. E aumento aki a significa cu scolnan ta ricibi en total 6.4 miyon
florin adicional. Minister a informa Parlamento cu trabounan riba e tereno aki ta sigui tuma
lugar y cu reunion cu e team di DOW cu a haci e trabounan di midimento ta tumando lugar.
Segun ley cada 3 aña mester revisa y ahusta e normbedrag y como parlamentario mi ta
compromete mi mes pa monitoria e proceso aki y percura pa enberdad esaki tuma lugar.
Papiamento como idioma di instruccion
Otro punto hopi importante cu a keda trata ta ehecucion di e maneho nobo di idioma y e
decision sumamente crucial y importante cu a keda tuma pa introduci Papiamento den klas 1.
Un tematica cu pa hopi aña tabata riba mesa y cu porfin a tuma e curashi y determinacion pa
tuma e decision y haci esaki un realidad.
Di aña pasa a cuminsa prepara tur scol, docente y
alabes e materialnan necesario y desde aña escolar nobo nos muchanan den klas 1 por siña
lesa di skirbi na papiamento y ta haya hulandes den un acercamento nobo cu ta pas cu nos
contexto na Aruba. Hulandes ta keda un lenga straño pa nos aunke cu e ta un di nos
idiomanan oficial. Minister a informa Parlamento cu inicio di aña escolar nobo a bay bon y
cu visitando e scolnan, principalmente e klas 1 ya nan por mira un diferencia grandi.
Muchanan ta mas participativo y e cambio den e intercambio entre e maestro y alumnonan ta
remarcabel y tin maestro ta bisa cu e ta te hasta impresionante.
Muchanan activo den klas
Mi mester bisa cu ami sugur ta contento cu nos muchanan por haya les den nan idioma
materno. Na mi opinion esaki sigur lo haci nan fundeshi pa por siña otro idioma y materia
mihor y mas liher. Banda cu nos ta crea muchanan cu ta durf mas pasobra nan no tin e
limitacion di dominio di hulandes. Minister a informa Parlamento cu ya caba trabounan di
formacion di e maestronan di klas 2 a cuminsa y tambe di e materialnan correspondiente. E
decision aki tabata uno importante y necesario. Porta su impacto y resultado no lo ta visibel
den tempo corto pero mi ta convenci cu e lo aumenta e chens pa nos muchanan ta exitoso na
scol.
Pa finalisa mi kier subraya e hecho cu Minister Endy Croes a sa di percura pa trece
trankilidad den e veld di enseñansa. Desde un principio Minister a percura pa uni e veld, crea
un plataforma caminda tur schoolbestuur ta forma parti di dje y a percura pa un participacion
integral di tur actor den tumamento di decision pa loke ta trata enseñansa. Na mes momento a
percura pa e sentimento di responsabilidad ta di un y tur. El a fiha metanan cu ta specifico,
por keda midi, ta realistico y cu ta mara na tempo. Nos no ta unda nos kier ta ainda pero hopi
a keda logra y realisa ultimo 3 aña y mey aki!
Comunicado