Den un reunion di e Comision di Companianan Estatal, di Utilidad y Energia di Parlamento a trata entre otro e cobransanan halto di utilidad cu pueblo a ricibi. A invita e directornan di Utilities, Elmar y WEB pa por duna un splicacion y alabes pa pidi atencion pa e situacion aki.
Ta asina cu nos como parlamentario a y ta ricibiendo hopi keho encuanto cobransanan hopi halto di utilidad cu nos hendenan a ricibi. Ta trata cobransa cu a drenta fin di September 2022. WEB a indica cu nan no a ricibi mas keho cu nan usualmente ta ricibi, pero Elmar si a indica cu nan a ricibi hopi keho. Mirando e situacion Elmar a dicidi pa start e investigacionnan necesario caminda entre otro ta haci e analisis di e uzo concreto durante e lunanan anterior y ta laga controla e meternan.
Como splicacion di e aumentonan drastico a keda duna cu den e luna ey tin 3 dia mas cu a keda hiba den e calculacion di uzo total di cada cas, cual a pone cu hopi famia a pasa pa e siguiente bracket di tarifa, cu ta haci cu nan ta paga mas pa e cantidad di coriente uza. Esaki ta debi cu e meternan a keda midi laat door cu e ultimo dia di tuma meter a cay den weekend y a sigui coy meter e siman siguiente. Tambe a keda treci padilanti cu e luna en cuestion tabata un luna hopi calor y cu for di nan mesun cifranan nan por a tuma nota di un piek basta halto den e consumo total di nos pais. Segun informacion ricibi nos promedio di uzo pa famia na Aruba ta 700 KW pa luna y nan por a tuma nota cu hopi a pasa e luna ey 1000 KW.
Pa loke ta trata e meternan controla e keda conclui cu esakinan ta trahando bon y no tin fout den e cifranan registra. Elmar a garantisa cu nan aparatonan ta calibra y di confiansa y cu e conclusion general ta cu e uzo den e luna ey a subi substancialmente. Pa por verifica bo factura ta consehabel pa tuma contacto cu Elmar kende a indica cu a base di nan analisis di data personal di cada cliente lo wak si el a keda perhudica door di e 3 extra dia. Tambe ta bon pa pueblo sa cu por yega na un areglo di pago cu Elmar pa suma adicional cu ta keda cobra. Ta un hecho cu e tarifanan a keda ahusta na augustus y na september ultimo y cu esaki tambe ta hunga un rol den e cuenta cu nos tur a ricibi ultimo. Pesey mes nos mester ta mas consciente y uza utlidad na un manera rasonabel.
