Preparando pa e reunion di dialuna ultimo sigur nos por conclui cu e maneho serio y responsabel cu Gobierno ta hiba ta sigui saca su frutonan. Cifranan presenta, noticianan comunica, resultadonan concreto y proyeccionnan ta subraya esaki.
Net e aspectonan aki mi kier a duna atencion durante e reunion publico. Pone den perspectiva e parti di speransa y positivismo, e parti di recuperacion, e parti di kico si nos a logra. Pasobra enberdad como pais y como famia nos ta experenciando yen di reto pero tin hopi cosnan positivo y alentador tumando lugar.
Na mes momento mi ta consciente cu Pueblo kier mira y scucha na ki manera ta bay:
- crea cuponan di trabou;
- na ki manera Gobierno ta bay deal cu desaroyonan mundial cu tin impacto riba nan cartera;
- na ki manera/ via ki maneho of inversion ta bay yuda cu e placa den nan cartera ta rindi mas pa nan por cumpli cu nan debernan y cu ta resta algo pa recrea y por pasa tempo di calidad cu famia.
Pa loke ta trata bon noticia y perspectiva mi a trata e diferente bon noticia cu a keda duna e siman tras di lomba cualnan sigur tin of lo tin un impacto positivo pa nos hendenan manera: prijs di gasolin cu a baha, pensioen di biehes ta bay aumenta entrante 1 di januari 2023, presupuesto a keda entrega na tempo caminda e deficit a baha di 1.028 miyon florin pa 25 miyon florin (un logro grandi den solamente 3 aña di tempo), un grupo di 19 instructor a ricibi un contracto di trabou pa 5 aña, proyecto “Mi Mes Un heroe” su prome edicion a sali caminda e enfoke ta pa empodera nos mucha y hobennan y tambe pa haci comunidad mas consciente encuanto abuso di mucha pasobra cada mucha cu experiencia abuso ta uno di mas. Alabes mi a para keto na e hecho cu gobierno a anuncia proyectonan grandi cu lo yuda reduci e prijs di awa y coriente den un futuro cercano.
Pero no ta e siman tras di lomba so nos por uza como ehempel pasobra ta hopi mas a keda anuncia of ehecuta, manera anuncio di: e acuerdo entre Web y Eagle LNG, e expansion di parke di molina di biento, e cifranan di turismo caminda nos ta mira un recuperacion fuertisimo y esaki ta asta surpasando nivelnan di aña 2019, banco central cu a raporta un crecemento economico di 16.2% den e promer kwartaal 2022 vs promer kwartaal 2019, gobierno encuanto vuelo nobo for di London cu British Airways algo historico den cuadro di diversificacion, e performance di hotelnan cu ta surpasando nivelnan di 2019 y e tourism receipt cu ta e cantidad di placa cu turistanan ta laga atras den economia registra pa banco central ta mas halto cu 2019. Y asina nos por sigui menciona.
Esakinan sigur ta e noticianan cu nos kier scucha, noticianan cu ta subraya e maneho serio, responsabel y cu resultadonan concreto cu Gobierno ta hibando.
