Parlamentario Shailiny Tromp-Lee (MEP): Apesar di retonan Aruba tin varios desaroyo positivo cu nos mester ta orguyoso di dje

Diahuebs 1 di juni Parlamentario Shailiny Tromp-Lee tabatin e oportunidad pa hiba un discurso cortico na IPKO como Presidente di Commissie Koninkrijksaangelegenheden. Durante su discurso Parlamentario Tromp-Lee a comparti cu Aruba ta den e proceso di recuperacion despues cu Aruba a wordo afecta grandemente door di e pandemia di COVID-19. Tromp-Lee ta habri su discurso compartiendo con IMF a reconoce e recuperacion extraordinario di Pais Aruba despues cu IMF mes a indica cu Aruba ta den top di e paisnan na mundo cu a wordo afecta negativamente door di COVID-19. E recuperacion extraordinario aki ta e resultado di un gobernacion responsabel.

Aruba marcando historia cu un recuperacion extraordinario

Ta premira cu e crecemento economico di Aruba lo conoce un recuperacion di 101% den comparacion cu aña 2019. Turismo ta sigui crece y Aruba a conoce un recuperacion di 116% di turista y 118% di tourism receipts den comparacion cu aña 2019. Ta importante pa menciona cu aña 2019 tabata miho aña di turismo den historia di Aruba. 

Ademas di esaki Gobierno di Aruba ta trahando duro pa baha e percentahe di desempleo. Na aña 2019 e tabata 5.2%, na 2021 8.8% y na 2022 6.5%. Pa logra baha e percentahe aki mas ainda Gobierno di Aruba a introduci e proyecto ‘Aruba Kier Traha’ na unda cu ta haci un ‘job matching’ cu e mercado laboral. Na banda di e proyecto aki ta anticipando cu mas cupo di trabou lo bin den e sector di energia. E finansas di Aruba tambe ta bayendo den bon direccion. E presupuesto di aña 2023 a demostra un surplus di 1% di e GDP. 

Puntonan cu tin atencion di Gobierno

Banda di e desaroyonan positivo den area di turismo, enfasis tin cu y ta wordo poni tambe riba diversificacion di Aruba su economia. Aruba ta mira hopi oportunidad den e industria di energia. Na comienso di mei ultimo Aruba tabata e anfitrion di e prome conferencia di clima y energia “Caribbean Climate & Energy Conference” (CCEC). Gobierno di Aruba ta desea pa converti e tereno di e refineria den un ‘hydrogen valley’ y na unda Minister di Clima y Energia di Hulanda, Rob Jetten a duna su sosten na e proyecto aki.  Por ultimo ta bezig cu e plannan pa establece un instalacion di LNG riba e tereno di e refineria. Un di e prioridadnan di Gobierno di Aruba ta pa trata riba e reformanan a base di e Landspakketten pa haci nos Pais mas fuerte y resiliente den tur sentido di palabra. Aruba ta riba hopi bon caminda realisando e reformanan aki. 

Pa finalisa, parlamentario Tromp-Lee ta menciona cu apesar cu mundo ta wordo afecta pa un inflacion halto, prijsnan di energia cu ta subiendo y scarcedad di cuminda, Aruba toch ta riba bon caminda. Hunto nos ta recuperando!