Recientemente Parlamentario Shailiny Tromp-Lee di Fraccion di MEP a reuni cu dos
representante di Strategic Education Alliance (S.E.A.), Marianne van Veldhuisen, Adviseur
Instroom na The Hague University of Applied Sciences y Leoni Holleman,
studiekeuzecoach na Fontys, pa elabora riba e cooperacion continuo entre Aruba y scolnan di
enseñansa superior na Hulanda y preparacion di nos studiantenan pa nan estudio na Hulanda por
ta uno exitoso y elimina retonan cu ta stroba esaki.
Un di e temanan importante cu a bin dilanti durante e reunion ta e preparacion di nos
studiantenan, cu tin e deseo di sigui nan estudio na Hulanda. S.E.A. ta colabora te na e
momentonan aki cu 11 hogeschool na Hulanda y ta den negosacion cu universidadnan pa
nan tambe forma parti di e organisacion. Representantenan di S.E.A. ta bishita Aruba y tambe
otro islanan den Reino Hulandes pa asina duna workshops na scolnan (docentenan y
studiantenan) di enseñansa secundario y superior. Meta ta pa empodera e hobennan y yudanan
den e proceso di scoge e estudio corecto. Comienso di 2024 por ehempel S.E.A. a organisa un
conferencia na Corsou cu tema ‘studiesucces Caribische studenten’ pa enfoca riba e desafionan y
oportunidadnan pa studiantenan den Reino Hulandes. Prome cu esaki tabatin uno na Aruba.
Parlamentario Shailiny Tromp-Lee di su parti a comparti su logronan riba e tematica aki, door di
cada bes tabata trece e punto aki dilanti na reunionnan di Tripartiet y IPKO. Danki pa e
persistencia di Parlamentario Tromp-Lee, awo ta posibel cu studiantenan por haya nan BSN
nummer prome cu yega Hulanda. Parlamentario Tromp-Lee a comparti tambe diferente
puntonan di mehoracion, di cual Hulanda tambe por asisti cu esaki. Sra. Van Veldhuisen y
sra. Holleman tambe a informa di nan banda cu S.E.A. tin lasonan directo cu Vierlandenoverleg.
Tur feedback y puntonan di preocupacion y mehoracion cu ta bin dilanti durante nan consultanan
of cu ta wordo ricibi door di studentenraad den Reino ta wordo acopla den un rapport y entrega
na e ministernan den Reino Hulandes. Tambe Sra. Van Veldhuisen y sra. Holleman a
intercambia algun idea cu Parlamentario Tromp-Lee pa Aruba, di cual Parlamentario Tromp-Lee
a compromete su mes di lo cana e caminda necesario pa asina esakinan por keda realisa.
Pa finalisa Parlamentario Tromp-Lee a gradici Sra. Van Veldhuisen y sra. Holleman pa nan
tempo y bishita y a expresa su compromiso como Parlamentario di lo sigui sostene esaki, pa
sigura cu tur studiante Arubiano haya tur apoyo necesario durante nan transicion di Aruba pa bay
sigui un estudio na Hulanda. Sra. Veldhuizen y sra. Holleman a haci entrega di un buki di
cushina caminda un studiante di Caribe Hulandes tambe ta aparece den dje y alabes un wega cu
nan ta uza como tool pa yuda un studiante den nan escogencia di estudio. Sigur un reunion hopi
interesante y importante.
