Den cuadro di preparacion pa cu tratamento di Presupuesto 2022 nos como parlamentario ta manda preguntanan por escrito na Gobierno pa pidi aclaracion, informacion adicional y/of ricibi documentonan cu por brinda mas claridad na parlamento y asina tambe na pueblo. Mi a manda diferente pregunta pa Minister di Labor, Energia y Integracion pa locual ta trata e.o., desempleo bou di nos hobennan como tambe pa Minister di Husticia y Asuntonan Social pa haya mas informacion riba e.o., e proyecto di Veilige Bario’s.
Desempleo bou di nos hobennan
Den contestacion ricibi por escrito for di Minister di Labor, Energia y Integracion a haya como contesta cu segun data preliminario desempleo bou di nos hobennan ta entre 18.5 y 20.5%, cual ta menos cu na 2020 caminda esaki tabata 25.9%. Mi tin tur confiansa cu mescos cu a logra baha e percentahe di desempleo bou di nos hobennan na aña 2019 te cu 16%, awor un biaha mas cu un maneho adecuado y dirigi, mi ta convenci cu nos por logra baha e desempleo bou di nos hobennan un biaha mas. Un plan cu sigur por yuda pa nos logra esaki ta e National Action Plan for Youth cu pa motibo di COVID-19 a keda posponi temporalmente. Durante contestacion den reunion publico Minister Glenbert Croes a indica cu nan ta bay implementa e plan aki y ta sondeando e posibilidad di duna incentiva fiscal na doñonan di trabou ora nan tuma un hoben den servicio.
Veilige bario’s
Pa locual ta trata Minister di Husticia y Asuntonan Social, den un reunion publico dia 14 di maart 2022 a bin duna amplio informacion riba e proyecto aki. E proyecto aki sigur ta concorda cu e hayasgonan di e investigacion Quality of life of Aruba Youth. Den e investigacion aki ta keda subraya e importancia y necesidad pa crea barionan sigur, veilige bario’s. Intencion di Gobierno ta pa pone enfasis riba prevencion cual sigur mi ta haya na su lugar y necesario. Gobierno ta indica di kier bay realisa inversionnan sostenibel den nos barionan. Entre otro ta keda menciona den e contestacionnan ricibi cu lo bay introduci naschoolse programma’s den e diferente Centronan di Bario. Durante tratamento di presupuesto 2022 mi a haci e pregunta na Minister Rocco Tjon pa indica un liña di tempo pa cu e ehecucion di e proyectonan aki. Minister a informa cu manera presupuesto 2022 keda aproba e lo cuminsa ehecuta e proyecto di Veilige Bario’s.