Durante prome tanda di e prome dia di tratamento di presupuesto 2023 mi a subraya e falta di seriedad di parti oposicion. Door di bandona sala nan ta crea polemica innecesario y deha di cumpli cu nan tarea principal di controla gobierno. Anto net pa cu tratamento di e ley di mas importante cu ta e presupuesto di pais Aruba.
Nan ta referi na nan carta di dia 5 di september 2022, mediante Presidente di Parlamento, na Gobierno di Aruba caminda nan ta urgi pa Gobierno trek in e presupuesto presenta y re-encamina e proceso via Caft y Raad van Advies door di e decision di Gobierno pa no introduci BTW mas entrante 1 di januari venidero y na su lugar aumenta BBO cu 1%.
Ta bon pa pueblo sa cu e carta di oposicion a keda contesta door di Gobierno di Aruba 7 dia despues cu nan a manda nan carta, esta dia 12 di september 2022. Adicionalmente nan preocupacion y critica a keda debidamente contra aresta den e Nader Rapport (contestacion di Gobierno riba Raad van Advies) y den e Nota naar Aanleiding van het Verslag (contestacion di Gobierno riba e preguntanan manda por escrito door di Parlamento riba un ley). Pues ta duidelijk cu ta un strategia politico di oposicion. Loke ta subraya nan wega ta e echo cu nan a warda te awe pa haci nan show y informa cu nan no ta participa na tratamento di presupuesto 2023 si no cumpli cu nan exigencia si di dia 12 di september nan a ricibi e contestacion di Gobierno y tabata sa cu e ley no lo bay keda ingetrokken.
Ta bon pa pueblo sa, cu como preparacion pa e reunionnan publico aki, ta tene un Senioren Convent cual ta un reunion caminda nos ta stipula con e reunionnan ta bay tuma lugar. Na ningun momento oposicion a indica cu nan no lo participa na e reunionnan di presupuesto 2023. Ademas ta bon pa pueblo sa tambe cu Gobierno a busca conseho huridico debido y a contesta oposicion su carta debidamente. Conseho ricibi ta mustra cu e presupuesto ta cumpli! Pesey mes nos Fraccion ta sostene e decision di Presidente di Parlamento pa continua cu e reunion.
Segun ley Caft mester duna conseho DESPUES cu Staten trate. Un conseho di nan banda prome cu trata e presupuesto ta opcional y no obligatorio. No obstante e echo aki mester indica cu Gobierno a consulta cu Caft y a tene debido cuenta cu nan conseho fecha dia 9 di juni 2022. Esaki nos por lesa den Memorie van Toelichting riba pagina 14 pa 19.
Otro aspecto cu ta bon pa pueblo sa ta cu un presupuesto ta un apoderacion (machtiging) na Gobierno riba e parti di gastonan. Riba esey mester tin conseho di RvA cual debidamente a keda duna dia 12 di juli 2022. Riba cual mediante e Nader Rapport Gobierno di Aruba a reacciona dia 30 di augustus 2022. Pa loke ta trata e parti di entrada ta un schatting gobierno ta duna. Esey no ta cay dentro di e apoderacion cu nos ta duna ora nos aproba presupuesto 2023.
Pa loke ta trata e parti di entrada Gobierno ta provee un calculacion di e entradanan cu nan ta spera di genera den 2023. Esey no ta cay den e apoderacion. Loke a sosode ta cu iniciamente Gobierno su intencion tabata pa introduci un systema fiscal nobo entrante 1 di september, esta BTW. Pero mirando desaroyonan mundial y impacto di esaki riba e nivel di inflaccion a dicidi pa pospone esaki. Mas cu claro mester percura pa genera e entradanan necesario pa por carga e gastonan mara na e presupuesto presenta y nan a dicidi pa aumenta BBO cu 1 porciento.
E aumento aki ta regla den un ley apart cu e presupuesto. Un ley cu actualmente ta na Raad van Advies y ainda tin cu keda presenta na Parlamento.
Oposicion mester stop di bruha tera, haci nan trabou y cuminsa presenta e solucionnan cu nan tin cada biaha nan ta critica. Nan ta exigi pa Gobierno cumpli cu Caft y na mes momento ta contra tur accion cu Gobierno tuma pa por cumpli. Un falta di seriedad total.