Parlamentario Shailiny Tromp Lee den su disertacion na IPKO Curaçao: Hulanda kier trata deficit democratico y pasado di sclavitud y den mes rosea kier impone un Rijkswet riba islanan

Diamars 28 di februari parlamentario Shailiny Tromp-Lee tawata tin e oportunidad pa hiba un discurso cortico. Parlamentario Tromp-Lee ta habri su discurso bisando cu e ta contento cu a logra haci COHO un onderlinge regeling. E scenario di tin 3 persona apunta door di Gobierno Hulandes pa dicidi riba 3 isla den Caribe y cu no ta politicamente responsabel na niun hende, manera COHO tawata indica sigur no ta respeta e autonomia di Gobierno ni Parlamento di Aruba, Curaçao y Sint-Maarten. Pues ta contento cu tawata tin recepcion pa e peticion di cambio aki y cu a acepta pa sinta na mesa y negocia un onderlinge regeling cu ta positivo pa pais nan autonomia y tambe pa Hulanda por mantene cierto grado di control. 

Sinembargo, parlamentario Tromp-Lee ta lamenta cu ainda tin un rijkswet mas riba mesa, esta e RAFT. Sra. Tromp-Lee ta expresa den sala di IPKO: “E ta remarcabel awo, mientras cu Hulanda ta bezig ta atende cu e pasado di sclavitud y colonialismo, y cu den e temponan aki cu ta tratando deficit democratico cual ta un consecuencia di nos pasado, ainda Hulanda ta persisti pa impone un Rijkswet riba pais Aruba como condicion pa refinanciamento di nos debe. Hulanda kier haci esaki sabiendo cu e mayoria den parlamento no tawata y no ta di acuerdo cu con e proceso di e Rijkswet aki a cana y con el a culmina cu un ‘consensus obligatorio’.” 

Dia 21 di mei 2022 parlamento di Aruba a manda un relato unda ta cuestiona y haci yen di pregunta pa Gobierno di Hulanda riba e proceso y stipulacion di e dos Leynan di Reino aki. Lastimamente nos ta casi 1 aña mas leu y ainda Parlamento di Aruba no a ricibi contestacion riba e preguntanan haci pa asina haya claridad riba e con, y pakico di e dos leynan aki. E ta ainda incomprendibel dicon Hulanda no kier haci RAFT un punto di negociasion mescos cu a haci cu COHO unda ta respeta e autonomia di e paisnan. 

Finalisando, parlamentario Tromp-Lee a haci un peticion na tur presente pa ban bek na mesa di reunion, y yega na un areglo cu ta tene na cuenta e mesun argumentonan pakico COHO no ta riba mesa mas awe. Esaki ta necesario pa garantisa cu e historia colonial cu Aruba, Curaçao y Sint-Maarten tin cu Hulanda no persisti den presente y sigur no pasa pa futuro. Nos ta di acuerdo pa bini cu supervision pero ta di opinion cu mester por regla esaki mediante Landsverordening existente unda ta ahusta esaki y asina inclui normanan nobo