Diamars 1 di oktober 2024, Aruba porfin a haya su Ombudsman – Defensor di Pueblo- kende
ta sra. Jurima Bryson. Te cu awe Aruba tabata e unico pais den Reino cu no tabatin un
Ombudsman.
Un Ombudsman ta un institucion cu lo brinda proteccion na pueblo y nos muchanan. Un
caminda cu un ciudadano por acudi ora cu e ta sinti su mes prehudica of cu su derechonan no
ta keda respeta door di Gobierno, instancianan semi-gubernamental y otronan cu lo cay bou
di e ley aki.
Ombudsman of e Defensor di Pueblo ta un institucion independiente y imparcial. E Defensor
di pueblo mester evalua kehonan encuanto diferente aspecto di e aparato gubernamental y
semi-gubernamental. E mester defende e interes di e ciudadano y supervisa e calidad di e
servicionan publico den un pais. Cu otro palabra E Defensor di Pueblo lo yuda comunidad
investigando nan keho y of denuncia. Alabes E Defensor di Pueblo ta pa yuda e aparato
gubernamental pa mehora nan proceso y proceduranan basa riba e resultado di su
investigacionnan y informacion adkeri. Pesey mes E Defensor di Pueblo lo mester tin un
enfoke proactivo pa ta den contacto cu publico en general y trata tur keho of denuncia cu e
ricibi cu atencion cuidadoso y cu respet.
Haci E Defensor di pueblo un realidad tabata un di e metanan proponi den e acuerdo di
gobernacion di Gabinete Wever-Croes mirando cu e ta fortifica nos estado di derecho y ta
aporta na bon gobernacion. Durante di e reunion publico mi a felicita sra. Bryson y a desee
hopi exito cu ehecucion di e funcion di Ombudsman cu ta asina importante y esencial pa nos
pais.
Parlamentario Shailiny Tromp-Lee cu palabra di felicitacion y exito na nos Defensor di Pueblo Jurima Bryson
