Mi ta kere cu di ora cu reunion a inicia pueblo mes por a scucha y wak kico tabata e motibo
real pakico oposicion a pidi pa e reunion encuanto metemento den ministerio publico.
Meta di reunion tabata overduidelijk: Condena MP sin prueba y baha Evelyn Wever-Croes
como nos minister president. Pero e decision di Presidente di Parlamento pa yama un OB na
lugar di un OV a pone nan plan cay na awa. Un fayo den comunicacion den e coalicion nobo
di Raiz, MAS, Mansur, Gerlien Croes y AVP. Nos por a ripara mesora ora reunion a cuminsa
cu e decision di Kamperveen no a cay den bon tera cerca nan y pueblo mes por a scucha con
nan tur a sali atake.
Remarcabel tabata pa tende e splicacion di Lider di Fraccion RAIZ ora cu el a hustifica e
decision bisando cu ta keda na discrecion di Presidente pa yama reunion, cu ta na discrecion
ki tipo di reunion e ta yama of ki ora e ta cambia e tipo di reunion. Durante di reunion mi a
agrega tambe cu ta keda na discrecion di presidente di parlamento pa indica, segun custumber
laboral interno di parlamento, ki proceso ta keda encamina internamente ora ta trata un ley
delicado y di un enbergadura grandi pa nos pais. Mi a enfatisa e echo cu lastimamente cu e
frasenan cu mi a menciona inicialmente ta keda uza como hustificacion ora ta cumini so, pero
ora no ta cumini ta desacredita, acusa, y asta forma coalicion cu oposicion pa baha un
presidente di parlamento. Ta kibra acuerdo di gobernacion, menasando y exigiendo sin duna
splicacion concreto y contundente.
Durante reunion tin un lider di Partido nobato cu a papia di politica nobo, di nivel di politica
baho pero loke nos a bin ta experenciando desde 9 di september, ta un politica partidista y pa
beneficio personal, lagando un banda e bienestar general di nos pais y treciendo e stabilidad
di nos pais na peliger. Gobierno a cay! Ministernan ta demisionario! A baha Endy Croes
inhustamente como minister y intencion tabata pa durante e reunion aki haci mescos cu nos
Minister President.
Pueblo mes un biaha mas por a constata un falta di seriedad grandi di cierto coleganan
parlamentario. Ami a premira cu Accion y Fraccion di Mas ta bay start sali cu nan
informacion y prueba pa substancia nan acusacion di metemento di MP den Ministerio
Publico. Pero nan no tabatin NADA! Marisol kier a gaña pueblo cu e topico di reunion ta uno
otro y a bin cu e rapport di ARA, full mal bruha. Mansur a bin ta zwaai cu LBnan cu un tin
nada di haber cu e topico di dia cu por cierto ta trata documentonan di despues cu nan a pidi
pa e reunion. Y e mas grave tabata AVP cu a sali bisa cu nan no kier splicacion, nan no kier
haci pregunta, ta reunion publico nan kier y cu e meta mester ta pa kita Evelyn Wever-Croes.
AVP ta sali bisa cu nan tin prueba di metemento den Ministerio Publico, pero nan nota haci
mencion di nada specifico, ta indica cu no lo hiba e debate politico den sala pero lo haci’e
den prensa, cual sigur mi ta haya un lastima.
No obstante e tipo di reunion, e insiuacionnan cu nan ta haci di metemento den OM ta hopi
grave. Pakico no sali papia y trece prueba pa sostene bo acusacion? Valida bo acusacionnan!
Mustra peublo di unda bo “preocupacion” ta bin. Pero pa nan e reunion tabata puro show. Na
final, Minister Presider y Minister Tjon a bin prepara y a demostra cu prueba cu no tin
mentemento den OM. Porcierto un carta di OM a keda poni ter inzage (esta cu oposcion
tambe por lesa y wak pa nan mes) pa subraya esaki.