Durante reunion publico caminda a atende cu e ley encuanto Tofanelli, Parlamentario Tromp-Lee a reta Mike Eman y Mike de Meza pa sali y brinda e claridad na pueblo door di contesta dos pregunta: 1) Dicon Gobierno di AVP no a bay den cassatie contra Tofanelli ora na 2016 Pais Aruba a perde caso den Corte Comun y; 2) Dicon Gobierno di AVP a no persigui Eddie Briesen?
Tromp-Lee ta bisa cu pueblo mester realisa e hipocresia politico di partido AVP. Mientras cu Gerlien Croes a sali grita, punta dede y acusa MEP y Eddie Briesen, awe a sali na cla cu of e comunicacion interno di AVP ta fatal of enberdad ta un solo meta AVP tin, esta malinforma pueblo, papia mentira, y acusa incorectamente y sin base Gobierno actual y Fraccion di MEP y Raiz.
Segun Tromp-Lee un meta oposicion tabatin awe. Percura pa pueblo kere cu e ley cu nos ta trata awe ta pa proteha Eddie Briesen. Un mentira fragrante. Ta kico tin di proteha? Realidad ta cu Tofanelli a cuminsa un caso contra gobierno, cu ela perde den prome instancia, pero cu ela gana den apelacion (Corte Comun) na november 2016. Corte Comun a dicta entre otro cu: 1) e contract entre Pais Aruba y Tofanelli ta un contract legitimo y gobierno di AVP no tabata mag di a kibr’e manera cu nan a haci; 2) e contract no ta “in strijd met openbare orde” mirando cu a keda prueba cu ya na oktober 2008 a negocia e prolongacion y e tempo ey gobierno no tabata demisionario y por a tuma e decision (rechtsoverweging 3.9), 3) Pais Aruba, Eddie Briesen, NO a actua contra ley di contabilidad (rechtsoverweging 3.10). Asina tin mas argumento menciona den e sentencia di Corte Comun cu ta desbarata un pa un tur e argumentonan cu gobierno di AVP a duna pa kibra e contract, y 4) Pais Aruba mester paga Tofanelli compensacion). 3 hues imparcial a tuma e decision aki y toch AVP y MAS kier sigui cuestiona.
Mike Eman manera semper no a acepta e reto y no a ni drenta sala mas. Mike de Meza si a dicidi pa contesta Tromp-Lee caminda e la contesta cu a base di conseho di Gobierno DI AVP a dicidi pa no bay den casacion y cu Gobierno di AVP, mediante su persona, a dicidi pa no sigui persigui sr. Eddie Briesen. E la subraya cu e la para e persecucion. Pueblo, aki tur e acusacionnan di demas parlamentario di AVP a cay na awa. Tromp-Lee ta enfatisa cu pueblo mester realisa cu esaki ta e modus operandi di parti AVP…..acusa, acusa, acusa…..gaña, gaña y sigui gaña pa pueblo kere nan. Sin base esun nan nobo den AVP kier sigui cu e persecucion cu nan colega De Meza a bisa cu e la stop. Lo tabata bon pa Mike Eman sali bisa kico e ta pensa berdaderamente di e caso aki. Lastimamente Mike Eman no tabatin e curashi di papia den sala di parlamento pero ta sigui manda su muchanan manda manera semper pa instiga y malinforma pueblo. Lo ta bon pa prensa haci’e e pregunta na su siguiente rueda di prensa pa wak kico e ta contesta.