Oposicion cu cantidad di mentira malinformando pueblo
Mirando e comosion cu coalicion den oposicion a trece rond di tratamento di e ley di presupuesto di pais Aruba 2023 cu a pasa e proceso di conseho di Raad van Advies y CAft, Parlamentario Setty Christiaans-Yarzagaray a hiba un discurso den Parlamento basa riba datonan cu ta hechonan (Facts) pa cu pais Aruba pa por trece claridad pa pueblo.
Ta un hecho cu presupuesto di pais Aruba di aña 2023 a wordo entrega na tempo riba dia 1 di september cumpliendo asina cu ley. Ta un hecho cu instituto manera IMF a conseha Aruba pa bay mas den sistema di impuesto indirecto y pesey partido MEP a tuma e curashi pa introduci BBO na 2008 cu hasta a haci cu MEP a perde eleccion. Cu tempo a pidi pa evalua BBO despues, mirando cu e tipo di reforma aki tin su efecto di schakkel koppeling pero tambe pa drecha cumplimento di pago di e belasting aki sin conta cu tin un mercado informal cu tambe ta necesario pa e aporta na caha di Gobierno.
Ta un hecho tambe cu den pasado gabinete Eman tambe a hay’e den e posicion cu mester a introduci un otro sistema di reforma di belasting, e tempo ey ABB tempo minister di Finansas sr. Bermudes, na lugar di BBO. Pero tambe ta un hecho cu nan no tawata tin e curashi pa haci’e pa miedo cu e partido y su lider no wordo re-iligi pa drenta gobierno. Pero Gabinete Eman a introduci BAZV si, cu ta djis e mesun BBO cu otro nomber pa camufla mirando cu nan a bay campaña electoral cu nan lo elimina BBO cual ta e motibo pakico nan a gana eleccion cu n’e. Ta un hecho cu ta AVP a introduci BAZV na 2014 den di dos tanda di reunion publico den Parlamento tratando presupuesto di Aruba pa aña 2014 sin conseho algun di Raad van Advies.
Awe nan kier tilda gobierno pa haci un cambio na e banda di entrada di presupuesto di Aruba pa 2023 door di no introduci BTW awor, pero adapta e tarifa di BBO cu 1% desde dia 23 di juni di 2023. Motibo pakico gobierno a tuma e decision pa no haci awor ta paso despues di a laga profesionalnan calcula e efecto inflatorio, ta resulta cu esaki lo afecta pueblo na un manera no desea. E efecto inflatorio di e BTW combina cu e situacion mundial di transporte di producto cu a subi, ademas e scarcedad di producto cu a haci cu productonan a bira mas caro y prijs di gasolin causa pa efecto di guera entre Rusia y Ukraina ta resulta di ta den un forma di papia, un “perfect storm”. Gobierno pa motibo aki a scoge pa no re-emplasa BBO na e momento aki pa BTW pensando hustamente riba pueblo, pensando cu despues di e pandemia mundial mester duna pueblo y comercio poco mas espacio pa recupera y para mas stabil. Un otro hecho ta cu e presupuesto 2023, manera presenta den e nota di cambio, segun proyeccion ta cumpli cu Hulanda door di yega na un resultado di surplus di 1% di GDP di pais Aruba cu ta significa un surplus di 63 miyon florin.
Esaki ta un logro remarcabel y casi sobre humano cu den menos di 3 aña despues cu e crisis di Covid a haci su entrada na Aruba, por bisa cu Aruba ta “back on track” economicamente manera e tawata prome cu pandemia. Ta di aplaudi cu Gobierno por a presenta un surplus y ta spera cu Dios por sigui guia Aruba paso ainda e efecto di pandemia tey presente. Mester gradici tambe tur profesional cu ta asisti Gobierno cu ta trabounan duro cu awe por proyecta e logro aki. Tambe mester gradici sector di comercio cu sigur nan aporte na economia a yuda cu awe Aruba ta riba e rumbo aki, en especial e sector turistico.
