Setty Christiaans-Yarzagaray, Parlamentario di
fraccion di MEP, a informa cu recientemente a trata Presupuesto 2024 pa e Ombudsman di
Aruba. E Parlamentario ta desea hopi exito na e Ombudsman pa cu e fondonan necesario pa
eherce funcion, enfatisando cu MEP a sostene esaki desde principio, no solamente riba e ley,
pero tambe riba e persona cu ta ocupa e posicion.
Yarzagaray a resalta cu e nombramento di e prome Ombudsman ta un parti historico di
Aruba, y Fraccion MEP ta hopi contento, no solamente pa su capacidad, pero tambe pa e
hecho cu un hende muhe por ocupa e puesto aki.
Proceso di Presupuesto 2025
Siguiendo riba e tema di presupuesto, Parlamentario Yarzagaray a splica cu riba 4 di october
2024, a tuma lugar un reunion pa discuti e proceso pa e presupuesto di 2025. E proceso a
cuminsa ora cu Minister di Finansas a entrega e presupuesto prome cu fecha stipula pa ley. E
Parlamentario a indica cu Parlamento a haya mas o menos cuatro siman pa analisa e
presupuesto, subrayando cu esaki ta e ley mas importante cu Parlamento ta trata.
"E ta tarda mas o menos un siman pa aproba e presupuesto pasobra mester pasa door di tur
ministerio, e maneho ademas di gasto y entradanan di Pais Aruba," Yarzagaray a bisa.
E verslag (proceso di preguntanan door di Parlamentarionan) di presupuesto a wordo aproba,
y awor ta bek na gobierno pa contesta e preguntanan cu tur fraccion a haci durante e periodo
stipula. Siguiendo e proceso, ora cu gobierno duna su contesta, Parlamento lo haya un Nota
(nota naar aanleiding van het verslag) cu ta cera e ciclo pa trata y aproba e presupuesto, segun
Yarzagaray.
Desacuerdo den Parlamento
"Mirando e acontecimentonan desde 9 di september bin ariba, na unda tin un constelacion
hunto cu otro banda di sala, hunto cu oposicion pa aproba cierto aspectonan", Parlamentario
Christiaans-Yarzagaray kier para keto na e hecho cu segun oposicion, nan ta bay haci un
diferencia den Parlamento pasobra e mayoria mes den Parlamento, partido MEP, haciendo
nan trabao mes, ta wordo desaproba den e forma di traha door di oposicion." el a bisa.
Un punto importante cu Yarzagaray a para keto riba dje ta cu e ley di presupuesto ta e ley di
mas importante pa Pais Aruba. Sinembargo, fraccionnan manera RAIZ no a haci ningun
pregunta riba e presupuesto di 2025. Partido MAS a haci 21 pregunta, Gerlien Croes a haci
27 pregunta, mientras cu Accion21 a haci cero pregunta. "Esnan cu kier presidencia di
comision di Finansas den Parlamento, no ta haci ningun pregunta riba e ley di mas importante
di nos pais," Yarzagaray a agrega.
Fraccion di MEP ta cumpli
Yarzagaray a enfatisa cu su fraccion, MEP, si ta haciendo su trabou manera debe ser. "Ami
mes, di fraccion di MEP, a haci 72 pregunta riba presupuesto. Nos fraccion den su totalidad a
haci mas di 200 pregunta, mientras cu miembro di oposicion sr. Mansur a haci cero y partido
Raiz tambe a haci cero pregunta ." E Parlamentario a enfatisa cu MEP ta cumpli cu su
obligacion y ta traha manera cu e pueblo ta pidi.
El a termina bisando cu e no ta compronde esnan cu ta critica e manera di traha di MEP,
specialmente mirando cu ta oposicion mes ta esun cu no ta cumpli cu nan rol den un proceso
asina vital manera ta e presupuesto di un pais.
