Dia 25 di maart di e aña aki Parlamento a aproba presupuesto di emergencia di Pais Aruba cu a cambia di panorama totalmente compara cu e prome concepto presenta na Parlamento. Pakico? Pasobra e prome presuepuesto presenta a refleha entreda den caha di gobierno di 1,569 miyon florin y gastonan di 1,523 miyon resultando den un saldo reflehando un surplus di 46 miyon florin, cu ta 0.8% di GDP di Aruba. Si a realisa e surplus aki lo tawata e di 4 surplus desde existencia di pais Aruba cual practicamente tur a tuma lugar den periodonan di gobernacion di partido MEP. Necesidad financiero tawata inicialmente di 315,1 miyon florin paso ainda un surplus di 46 miyon no ta yega pa paga tur debe (fiansanan) di pais Aruba.
COVID-19 a haci cu mester a aproba un Presupuesto di emergencia
Momento cu Aruba a registra su prome caso di Covid dia 13 di maart di e aña aki tur scenario financiero presenta den presupuesto mester a wordo cambia basa riba e miho informacionnan cu departamentonan di Gobierno por a brinda. Esaki considerando cu e crisis ocasiona door di Covid-19 ta un crisis nunca experiencia sigur no den e ultimo 100 añanan.
E panorama presenta den e presupuesto di emergencia aproba pa Parlamento di Aruba dia 25 di maart di 2020 tawata lo siguiente: entradanan di 885.4 miyon y gastonan di 2,152.4 miyon florin cu a resulta den un saldo reflehando un deficit di 1,266.9 miyon florin. E deficit aki grandemente ta debi na falta di entrada a consecuencia di mester a cera frontera di Aruba pa nos bishitantenan manera hopi otro pais a haci. E medida necesario aki pa purba maneha e contagio di Covid riba e nivel di salubridad di pueblo di Aruba pero su impacto riba finansas y economia tawata grandi.
Ta premira un miho resultado presupuestario cu a spera na maart
Na juli a logra habri frontera bek pa re-activa economia bek pero tambe saliendo di e punto di bista cu awor profesionalnan den cuido na Aruba ta miho prepara y tin miho informacion con pa deal cu e pandemia di Coronavirus. Desde cu a habri frontera bek economia a cuminsa draai poco poco bek aunke no na e nivel cu Aruba tawata experiencia.
Dia 2 di november ultimo Parlamento a trata presupuesto supletorio na unda e panorama presenta toch a mustra un mehoracion leve compara cu loke primeramente Gobierno y su departamentonan a premira.
Cambionan cu por a wak y ta premira awor na entradanan di pais Aruba ta 1,004 miyon y gastonan ta 2,018 miyon florin resultando den un deficit di 1,114 miyon florin cu ta un mehoracion di 152 miyon florin. Pa loke ta trata e necesidad financiero cu ta e deficit plus e aflossing di fiansanan di 2020 ta suma total di 1,409.9 miyon florin mientras cu inicialmente esaki tawata premira di ta 1,646.7 miyon na maart. Esaki ta mustra un diferencia di 236,8 miyon florin menos cu a premira cu riba su mes ta un presion menos pa pais Aruba mirando cu esaki ta 236.8 miyon florin menos cu gobierno no mester fia y crea mas debe pa Aruba.
Cambionan presenta den presupuesto 2020 ta acapara FASE, ayudo na MKB y Loonsubsidie
Den a tabel adhunto por nota e cambionan primordial presenta den presupuesto supletorio. Por nota claramente e asistencia di Gobierno di Aruba na FASE pa esnan cu a perde entrada, ayudo di MKB (empresa mediano y chikito) y tambe asistencia na Loonsubsidie. Ademas di e asistencianan aki por nota loke gobierno ta premira cu mester sostene fondonan di tanto AZV como SVB door di perdida di entrada di e pueblo trahador cu ta aporta na e fondonan di AZV y SVB.
Por nota cu entre FASE, sosten na MKB y Loonsubsidie ta presupuesta un sosten di total 410 miyon florin y tambe asistencia na fondo di AZV y SVB ta suma 234 miyon florin. Pues na banda di gastonan di operacion, pagamento di debe, Gobierno mester aloca 644 miyon extra na e gastonan aki so cu ta efecto directo di Covid-19 sin conta efectonan indirecto manera e falta di entrada di 508 miyon florin den caha di gobierno.
GDP den 2020
Presupuesto inicial di pais Aruba a presenta ingreso pa Aruba, GDP, na 5,849.2 miyon florin na unda cu momento di aproba presupuesto na maart ultimo esaki a wordo ahusta na 5,369 miyon florin. Despues cu a logra haya un bista poco mas concreto di parti di Departamento di Asuntonan Economico y Comercio (DEACI) conhuntamente cu Oficina Central di Estadística (CBS), por a nota den presupuseto supletorio cu ta premira ingresonan di pais Aruba realisa na 3,978 miyon florin. E indicador aki ta duna un bista di e efecto cu pais Aruba completo lo sinti na falta di entrada door di e impacto di Covid-19.
Conclusion
Un falta drastico di entrada y gastonan mas halto proyecta door di impacto di Covid pa por maneha e situacion na Aruba, haciendo tur intento y esfuerso pa logra financiamiento tanto riba mercado local como na Hulanda, cumpliendo cu condicionnan stipula pa Hulanda pa logra financiamiento di tranche 1 y 2, ainda pais Aruba a keda cu un gap di 209 miyon florin pa cera aña 2020 di su presupuesto. Como Gobierno responsabel y cu un deber moral pa mantene e pais, su hendenan y su economia pa nos pais no cay den otro, no ta keda niun otro alternativa cu logra haya e 209 miyon cu falta pa cera aña 2020.
Segun Parlamentario Setty Christiaans-Yarzagaray, bay contra e decision pa ayudo di Hulanda kiermen bay contra pa e pueblo cu a perde trabou of cu a wordo afecta door di COVID door di bay contra pa paga FASE, MKB y Loonsubsidie y ademas di bay contra pa yuda e fondo di SVB y AZV. No tawata un decision facil ni pa Gobierno ni pa Parlamento pero si necesario!
(Informacionnan den e articulo aki ta obtenibel publicamente riba Parlamento su website of via un peticion na Parlamento di Aruba)
