Tin un analisis haci di e cuentanan anual di WEB, pa loke ta e añanan 2011 te cu 2019. Specificamente por wak si gas natural ta mas beneficioso cu “fuel oil”. Resultado di e analisis aki ta mustra cu por a scapa pueblo di Aruba 360 miyon dollar (650 miyon florin) si a bay over na gas natural enbes di “fuel oil”. Na mes momento tambe lo no a produci 2.3 miyon ton di emision (Co2) durante e añanan menciona.
VISION GABINETE WEVER-CROES
E vision di nos prome Minister sra. Evelyn Wever-Croes ta uno simpel y humilde. Baha prijs di awa y coriente! Y esaki a wordo logra tambe caba na 2020, caminda a conoce un reduccion di 10% residencial y 7% comercial. Un maneho integral pa energia y p’esey tin reunionnan structural cu tur companianan estatal hunto pa asina ehecucion di e vision ta eficiente. Despues cu Eagle LNG a wordo selecta for di e proceso di REOI, selecta pa un comision di conseho independiente, negosacionnan a sigui cu Eagle LNG. Esaki a conduci na e hecho cu Refineria di Aruba (RDA) a firma un acuerdo di exclusividad cu Eagle LNG.
BALOR AGREGA DI PROYECTO
Nos ta papia akinan di un proyecto cu lo crea alrededor di 150 cupo di trabou y un inversion di 185 miyon dollar. Ora bo papia cu comerciantenan nan ta splicabo cu nan dolor di mas grandi ta e prijs di awa y coriente cu ta haci’e costoso pa opera. Pues si e inversion aki den nos economia por crea cupo di trabou y na mes momento baha prijs di awa y coriente e lo ta un balor agrega significante pa Aruba. Banda di esaki tambe lo bo haci Aruba mucho mas atractivo pa inversionistanan.
E proyecto aki ta encera construccion di un planta di gas y tanki, y un “bunkerstation”. Banda di esey lo nifica cu lo exporta LNG pa nos region, creando entrada pa pais Aruba. Pero tambe si logra concretisa re-apertura di nos refineria, esaki lo bay wordo opera riba gas.
PA CONCLUI
Na 2006 a adkeri e prome motornan y na 2008 a bolbe inverti den esaki. Na 2019, bou Gabinete Wever-Croes, a adkeri e ultimo 6 motornan Wartsila. Aworaki RDA ta suministra WEB cu “Heavy Fuel Oil” pa nan operacionnan, cual tambe por wordo conduci riba gas. Pues ta mas cu logico cu lo cumbini pueblo di Aruba pa cambia di HFO pa gas natural. Asina prijs di awa y coriente lo baha substancialmente y esaki lo nificia un reduccion drastico den emision (Co2).
