ORANJESTAD, Aruba
Robert Candelaria miembro di fraccion di AVP den Parlamento, a informa riba e reunion cu a tuma luga diabierna mainta, relaciona cu e ley di ARUBIG caminda a scucha tanto HAVA como ASHA riba puntonan cu nan a trece dilanti relaciona cu introduccion di e ley aki.
“Durante di e ‘bijeenkomst’ aki representantenan di e dos oranisacionnan aki a trece nan puntonan dilanti hunto cu nan preocupacionnan y parlamentarionan por a haci diferente pregunta pa cu e ley di ARUBIG.
Ta importante pa nos bisa cu na Aruba ta importante pa nos tur ta desea pa yiunan di tera kendenan a studia den region, logra di haya e posibilidad pa eherce loke nan a studia p’e, cu ta e trabou cu nan a bin pa haci.
Nos ta kere si cu esaki tin cu bay na e forma corecto y pa tal motibo fraccion di AVP a haci diferente pregunta pasobra tin diferente cos cu no ta mucho cla y tin tambe diferente preocupacion caminda nos kier pa e calidad medico cu ta wordo brinda na nos comunidad, ta di e nivel mas halto.
Nos kier pa e costonan medico por wordo bon controla y nos no kier pa bay tin clinica cu ta lanta tur caminda riba nan mes y nos kier pa e forma cu ta controla e estudio cu e medico a haci, e recertificacion cu cada un di nos dokternan di cas y specialistanan tin cu haci, ta conta pa tur hende cu ta brinda servicio.
A haci peticion na Minister pa duna mas tempo prome cu e ley pasa, pasobra e no ta un ley cu por vota riba dje, pero Parlamento por duna su pensamento riba dje. E ta nifica cu despues cu dos siman e ley ta na Parlamento y nada no pasa, e ta drenta na vigor.”
Candelaria a haya cu ta importante pa duna e tempo necesario mirando e impacto grandi cu esaki ta bay tin riba sector medico en general. E tempo ta pa duna idea- y sugerencianan cu por tene cuenta cu nan.
Un biaha mas e Parlamentario a menciona cu profesionalnan aki ta frontliners, hunto cu Polisnan. Asina nan a haya informacion cu pa cada dokter di cas tin un cantidad averahe di 40 pashent cu coronavirus, cu e dokternan mester bay bishita nan na cas tambe.
Hustamente den e periodo aki a reduci nan salario cu 25% pa cual e kier a manda palabra di aprecio pa nan tur. Awor no ta tempo pa critica dokternan di cas y haci nan bida mas dificil, pero cuida nan mas cu nunca den e tempo dificil.
