Miembro di fraccion di AVP, sr Robert Candelaria den conferencia di prensa a splica cu a tuma nota di e vacunanan cu Hulanda ta manda pa pueblo di Aruba y e programa di vacunacion cu gobierno a bini cune pa vacuna nos hendenan.
“Nos ta gradici Hulanda pa e vacunanan cu a manda y tambe nos ta gradici DVG y e staf cu ta haciendo un tremendo trabou pa vacuna nos pueblo, specialmente esunnan mas vulnerabel den nos comunidad.
Den caudro di esaki, Candelaria kier haci un apelacion riba gobierno, pa re-evalua su prioridadnan ora dicidi ken mester vacuna prome. E ta bisa cu ta conciente cu ta un cantidad limita di vacuna a manda pa Aruba, pues gobierno mester haci escogencia ken ta vacuna prome.
Nos ta contento cu esunnan cu a vacuna prome ta specialmente e profesionalnan den e field medico, pasobra nan riesgo ta hopi grandi pa bin den contacto cu hende infecta cu covid. Nan riesgo pa contagio y bira malo ta grandi. Den caso cu esaki pasa nan mes por infecta nan sernan keri, coleganan y otro pashentnan. Despues cu a vacuna e parti aki di e frontliners a sigui cu esnan di edad mas halto y esunnan vulnerabel, cu tambe ta un bon escogencia.
Nos peticion pa re-evalua prioridadnan di secuencia di vacunacion ta pasobra tin mas frontliners cu tambe ta core riesgo diario pa wordo infecta. Ta trata aki di hendenan trahando den nos Cuerpo policial, CEA, KIA y GNC. E grupo aki no ta solamente core riesgo, pero tin hopi ehempel di brotenan den e departamentonan aki tumando luga caba.
Den polis na mas c’un ocacion team- y departamentonan a haya nan mes cu hopi caso di infeccion, poniendo nan famia- y sernan keri, pero tambe coleganan y otro ciudadanonan, den riesgo. Nos por a lesa cu mescos a pasa tambe cu personal di CEA.
E hendenan den e field aki no tin e luho pa ora nan yega un caminda pa pidi tur hende pa bisti nan tapa boca, pa despues pidi tur hende pa pone hand sanitizer y tambe mantene social distancing, prome cu nan drenta den accion
Hopi biaha nan mester trata cu hende di cerca y bou di condicionnan tenso y hasta peligroso. Pa e motibo ey nos ta haci un apelacion na gobierno pa pone e gruponan vulnerabel aki como prioridad den e siguiente grupo pa ricibi e vacuna.
Laga nos mustra cu nos ta balora y cuida nos frontliners cu riba nan turno mester cuida nan bek. Tin mal contento caba cu e reduccion salarial di nan, siendo cu den otro paisnan den Reino a duna nan extra recompensa den e temporada di covid pa e extra riesgo cu nan ta core.
Nos ta mira cu mal contento y tension den nos comunidad ta creciendo tur dia y ta e mesun hendenan aki gobierno lo tin mester haci apelacion riba nan pa mantene orden publico y cuida nos pais si algo sali for di man. Pues ta ora pa pone nan prome,” Parlamentario Robert Candelaria e declara.
