Ultimamente diferente miembronan di Parlamento di Aruba a asisti na e desvelo di e logo nobo di Fundacion Parlamento Hubenil Aruba. Parlamento Hubenil ta preparando pa celebra nan di 20 aniversario den 2023. Pa cuminsa cu e celebracion aki, Parlamento Hubenil su prome evento tabata e presentacion di nan logo nobo. Un logo cu ta refleha e hoben di awendia y tambe kico ta e metanan di Fundacion Parlamento Hubenil Aruba.
Un ‘Parlamento Hubenil’ ta un simulacion di un parlamento, pero cu ta wordo forma pa hobennan. E parlamento hubenil aki tin bes por tin influencia riba e decisionnan di un pais of areanan cu ta concerni e hobennan.
Kico Parlamento Hubenil ta ofrece e hoben?
Desde e existencia di Fundacion Parlamento Hubenil Aruba, varios hoben a haya e oportunidad pa ta miembro di e organisacion y participa na diferente tayer (workshop) di entre otro liderazgo, debate, presentacion y mas. Adicionalmente, e hobennan na diferente ocasion a ‘gosa’ di e oportunidad di representa nan organisacion y Aruba den exterior.
Parlamento Hubenil pa medio di su cursonan y e oportunidad cu e fundacion ta brinda na e hoben pa ta miembro di e organisacion, ta contribui na e desaroyo personal di e hoben. Ora cu e hoben bira miembro di e organisacion, e ta sera conoci cu otro hobennan y asina ta engrandece su netwerk. Durante di curso di debate, e hoben ta desaroya su auto-estima y su habilidad di papia dilanti un grupo of den publico. Banda di esey, e hoben ta bira un ciudadano critico y consciente na momento cu e ta haci bishita na diferente instancia, instituto y fundacionnan. Asina nan ta haya un conexion cu e realidad di nos isla y por vocifera nan pensamentonan y vision pa futuro cu ta regarda nan.
E balor agrega di Parlamento Hubenil pa Parlamento di Aruba
Parlamento di Aruba ta contento cu Fundacion Parlamento Hubenil ta logrando nan di 2 decada di existencia. Parlamento Hubenil ta un plataforma cu ta representa e hubentud di Aruba y pa medio di e plataforma aki por intercambia nan experiencianan y vision cu Parlamento di Aruba. Di e manera aki un participacion activo di banda di e hubentud di Aruba ta bira mas concreto y asina por stipula maneho cu ta na e deseo y realidad di nos hobennan. Finalmente Parlamento di Aruba ta manda un palabra di felicitacion na tur hoben miembro, directiva y coordinadora di Fundacion Parlamento Hunenil Aruba.