Parlamentario di Fraccion di MEP, Ricky Hoek a duna di conoce cu Partido Movimiento Electoral di Pueblo (MEP) ta un partido social-democrata caminda cu mensualmente tin su conseho di partido y ta atende cu tur topico. Corupcion y corupcion den partido sigur ta wordo debati durante di conseho di partido. Y esaki ta solamente partido MEP ta eherce compara cu otro partidonan politico.
Recientemente a bin den noticia un biaha mas e caso di Aruba Huis caminda e ex-director a keda deteni. E detencion aki parce di a inspira algun periodista y politico pa celebra cu tin caso di corupcion den partido MEP. Ta parce cu awor diferente caso di corupcion ta liga na MEP, caminda cu cada partido politico mester para responsabel pa nan hechonan. Manipulacion di noticia ta loke e periodista y politico nan aki gusta haci, pa desvia pueblo di e berdad tras di nan mes.
MEP ta denuncia corupcion
Hoek a agrega cu MEP ta e UNICO partido politico cu ta denuncia corupcion, sea esaki ta den su mesun seno, cerca un otro partido politico of den aparato gubernamental. Ta partido MEP a bin cu e leynan di integridad, screening di ministernan, relato financiero di cada candidato politico y financiamento di partido politico.
Cu e leynan aki, por controla inmediatamente si tin iregularidadnan sea cu un candidato politico, un minister, un partido politico y of otro den un otro sector gubernamental. Banda di esey a bin cu e ley di Ombudsman, caminda cu un ciudadano ta sinti cu su derecho a keda atacha, e por pidi pa ayudo huridico cerca e Ombudsman.
Pa ta specifico den e caso Tulipan (Arubahuis), mester accentua cu ta nos propio Minister President sra. Evelyn Wever-Croes y cu ta forma parti di partido MEP cu: 1) a pidi pa investiga e iregularidadnan den Arubahuis 2) a duna Parlamento di Aruba tur informacion riba e caso y 3) a entrega keho contra propio ex-colega di partido.
Diferencia di actitud entre MEP y otro partidonan politico
MEP ta e partido cu a demostra di tin un actitud pro-activo y contra corupcion na cualkier nivel. MEP a hisa e standard pa cu integridad. Cosnan cu antes tabata masha normal den politica, nos mes a expone pasobra nan no ta normal mas.
Pero en cambio, partidonan manera AVP, MAS, Accion21 y un parlamentario independiente te dia di awe no a cuestiona casonan di mega corupcion cu a y ta afectando nos pais drasticamente. E actitud mas importante ta, cu ora bo ta sospechoso y of culpabel den caso di corupcion, bo ta retira boluntariamente di bo puesto. Esey politiconan di MEP sa haci, pero no por bisa asina di esnan di otro partido.
Esun cu kier celebra corupcion den MEP, mester cuminsa papia di nan propio corupcion prome, Parlamentario Ricky Hoek e declara.
