Corupcion ta existi na tur nivel per sin duda Caso Avestrus ta esun mas grandi di Aruba
Den e siman aki di 12 pa 14 di december e caso avestrus ta un biaha mas den noticia. E biaha aki caminda cu e abogadonan lo ta defendiendo e sospechosonan di e actonan di corupcion di cual nan ta ser acusa pe. Tin diferente actonan criminal y no-etico cu por wordo considera como corupcion. Actonan di corupcion por wordo realisa door di ‘comision’ pero tambe ‘omision’ (laga afo). Un politico, ambtenaar, doño of empleado por abstene di actua na forma corupto of por actua na forma corupto den nomber di su funcion, a cambio di un beneficio personal of pa un empresa.
Formanan di corupcion
Ta importante pa nos como ciudadano por reconoce e formanan di corupcion cu ta pasa rond di nos. Tambe, pa nos tin un definicion di corupcion den su totalidad. Corupcion por wordo defini como un conducta deshonesto of fraudulento door di un persona na poder, tipicamente usando soborno. Alabes corupcion ta keda categorisa den diferente forma entre otro: oferta y demanda, convencional, grandi, politico y sistemico.
Ora ta papia di e forma di ‘oferta y demanda’, ta referi na e hecho cu ta ofrece un pago ilicito of un producto, material of resultado y e demandante ta acepta. Tin e forma di corupcion convencional den cual un ambtenaar di schaal halto, medio of abou ta ricibi of acumula ilegitimamente un bentaha (rikesa) indebido pa su uso personal, sin tene cuenta cu e interes publico. Ta existi un elemento di intercambio den e forma di corupcion aki. Tanto e ‘pidimento’ como e aceptacion di soborno ta wordo considera como e forma convencional di corupcion.
Corupcion politico ta wordo considera como un forma di corupcion grandi. Debi na e gravedad y e nivel halto di funcionarionan publico cu ta involucra. Aki nos ta papia di corupcion na e nivel mas halto di gobierno. E forma di corupcion aki por wordo relaciona cu Caso Avestrus. Caminda por mira cu un ex-minister cu ta un politico y e ambtenaarnan cu ta encarga pa cumpli cu leynan publico, mes ta corupto. Banda di esey, e caso ta demostra claramente unda gobierno y sector priva ta ‘bruha’ den otro politico y empresarionan ta favorese otro. Y den e gabinetenan Mike Eman I y Mike Eman II, Aruba a conoce corupcion politico bou di e casonan Ibis, Flamingo, Avestrus y Kukwisa. Y ainda lo por menciona algun cu a sosode den añanan 90 bou di e gabinetenan di Henny Eman.
Corupcion no ta pasa solamente den sector publico (gobierno), pero tambe den sector priva. Hopi biaha esun di gobierno ta haya mas atencion debi cu prensa ta publica mas tocante esaki. Sinembargo den sector priva tambe corupcion ta sosode. Doñonan of empleadonan di empresa entre nan mes tambe ta comete corupcion. Algun ehempel di corupcion den companianan ta soborno, estafa y metodonan di mafia. E diferencia entre corupcion politico y corupcion priva, ta cu e corupcion priva ta afecta solamente e compania (y su empleadonan) directamente. Cual den caso di corupcion politico, esaki ta afecta henter un pais y su habitantenan.
Por ultimo tin e forma di corupcion sistemico. E forma di corupcion aki ta existi ora cu corupcion ta wordo considera como ‘normal’ of ta biba den un of otro forma bou di e pueblo. Cu otro palabra, e ta existi den e rutina di tratonan entre gobierno y particularnan of empresanan. Asina por ehempel gobierno ta sera ‘dealnan’ cu cierto tiponan di compania y ta favorece nan cu pagonan astronomico structural. Di otro banda, e por ta caminda un compania ta favorece un politico sea den forma monetario of un producto of obheto.
Sea alerto y actua corecto
Na Aruba nos mester ta mas consciente di e diferente formanan di corupcion cu ta tumando lugar. Nos mester ta integro y abstene di ta forma parti actonan di corupcion. E por ta un acto chikito of grandi, pero e ta keda un acto corupto y castigabel. Y na final, nos mester tin e balentia y curashi pa denuncia e tipo di actonan criminal aki sea na un vertrouwenspersoon, polis, Ministerio Publico of na e (doño di) empresa y den futuro na e ombudsman. Na final di dia, corupcion ta afecta tur hende sea den forma directo of indirecto.
