ORANJESTAD,Aruba
Durante e ultimo conferencia di prensa di partido AVP, miembro di fraccion, Sr. Richard Arends a reacciona brevemente riba e contenido di e conseho di CAft riba presupuesto 2020. Aña nobo a habri cu yen incertidumbre pa pueblo, comercio y e industria turistico pa loke ta spera nan den gastonan adicional.
Añanan 2018 y 2019 e prome fase di reforma fiscal a wordo introduci y a ranca 250 miyon florin di nos economia durante ambos aña. E aña aki Gobierno tin premira di aumenta su entradanan cu 90 miyon florin mas como parti di e di dos fase di reforma fiscal. CAft ta bisa enfaticamente cu Gobierno no a reduci su gastonan, pero ta aumenta e peso di impuesto riba ciudadanonan, comercio y turistanan.
E conseho di CAft cu ta papia un lenguahe hopi cla caminda e ta bisa cu Gobierno no a percura pa tin reduccion di gastonan den un forma structural y contrario na e meta aki, gastonan a sigui subi pa aña 2020. Pa loke ta trata e entradanan: e peso di impuesto a sigui aumenta pa pueblo, ta keda aumenta pa comerciantenan pero tambe ta keda aumenta pa loke ta trata turistanan. CAft ta mustra cu e ley di supervision financiero y e protocol ta specificamente dirigi na mehora e situacion financiero, e sostenibilidad di finansa publico pero e presupuesto 2020 aki no ta contribui na esaki.
Gobierno lo por wel di ta cumpli riba papel cu e normanan pero den mesun rosea e conseho di CAft ta indica cu e norma aki ta wordo logra meramente dor di aumento di impuesto, aumento di entrada di pais Aruba y no door di reduccion di gastonan. Di e entradanan presupuesta, 55 miyon florin ta entradanan incidental — un palabra malo durante campaña electoral y tambe na momento cu e Parlamento nobo a sinta – unda cu esnan cu ta sostene Gobierno mes a bisa cu esaki lo no ta contribui na un finanzas publico sostenibel y lo separa esakinan di e entradanan structural. Gobierno na su turno a acorda cu Hulanda cu esaki lo ta e caso. Sinembargo den ultimo dos presupuestonan di Gabente Wever Croes ta eseynan so a wak y pa presupuesto 2020 esaki ta extremadamente halto,” Parlamentario Richard Arends a declara. “Ademas 111 miyon di florin na entrada pa aña 2020 asina no tin base legal, ni tampoco decision”