ORANJESTAD,Aruba
Fraccion di AVP ta reacciona riba e conseho di CAFT entrega na Gobierno relaciona cu presupuesto 2020. Awe miembro di Parlamento pa fraccion di AVP, Sr. Richard Arends, a atende e punto aki durante conferencia di prensa semanal di partido AVP. Sr Arends a mustra cu aña 2020 ta bayendo pa su di tres siman y Parlamento di Aruba no a ricibi e presupuesto pa aña 2020 y tampoco e leynan cu mester percura pa entradanan pa Gobierno pa e aña aki bou di e capa di e di dos fase di e reforma fiscal.
“E prome fase di reforma fiscal a resulta di ta simplemente un aumento di impuesto y e di dos fase na caminda pa e aña aki lo no ta diferente,” Sr. Arends a declara.
“Loke ta conoci te pa Parlamento aworaki ta solamente e contenido di e conseho di CAFT cu a sali publica tambe den varios medio di comunicacion durante e ultimo dianan. A hala nos atencion cu e fecha cu e conseho aki a wordo emiti, ta mesun fecha cu Parlamento a trata presupuesto supletorio 2019, esta 20 di december ultimo. Mientras cu fraccion di AVP tabatin preguntanan specifico riba e reforma fiscal, Minister a opta na e momento ey pa no contesta. Prome cu esaki mi a dirigi caba un carta pidiendo Gobierno pa un splicacion kico pueblo por spera den e 13 ley cu mester wordo cambia y a bolbe manda un recordatorio recientemente.”
E conseho di CAFT ta elabora den extenso riba diferente medida cu mester trece casi 90 miyon den caha di Gobierno pa 2020 ademas di e 250 miyon na medida cu a ser introduci den e añanan 2018 y 2019. Segun e documento aki, Gobierno tin intencion di introduci BBO na frontera na momento di importacion cu lo bin riba e BBO ya existente. Tambe Gobierno ta contemplando aumento di ‘deviezenprovisie’ 1.6% pa 1.9% cu lo bay afecta prijs di tur producto y servicio aki na Aruba. Tur e medidanan aki lo afecta e poder di compra, inversionnan, crecemento economico y tambe gastonan di haci negoshi. E di dos fase di reforma fiscal lo afecta tambe cartera di tur hende cu ta bishita nos isla. Di e forma aki tambe e ta afecta e competividad di Aruba compara cu otro mercadonan y esaki ta un punto cu CAFT tambe a trece dilanti den su conseho.
Presupuesto 2020 ta tene cuenta cu entradanan cu lo mester drenta na vigor dia prome di januari. Como cu e fecha aki a pasa, ta desconoci pa Parlamento y tambe pa pueblo ki dia e medidanan aki lo mester drenta na vigor y con mester tene cuenta cu esaki na momento di planea actividadnan comercial y inversion nan pa e aña aki.