Durante conferencia di prensa di fraccion di AVP, miembro di Parlamento mr. drs. Richard Arends, a para keto un rato na un acontecimiento importante den e ciclo presupuestario cu hopi biaha ta keda sin haña e atencion necesario, esta e proceso di duna cuenta y responsabilisacion. Parlamentario Arends a referi akinan na tratamento di cuentanan anual di 2016 te cu 2018. “Fraccion di AVP ta contento cu e proceso aki a wordo re-inicia, pasobra cu na aña 2018 por corda cu mayoria den Parlamento a desaproba e cuenta anual di aña 2016 cu tabata conta cu aprobacion di Contraloria General (Algemene Rekenkamer) y CAft,” Parlamentario Arends a bisa. “Awe a trata un biaha mas e mesun cuenta anual di aña 2016 cu e mesun investigacion di Rekenkamer dunando e mesun resultado.”
“E resultado di cuenta anual di aña 2016 cu a wordo desaproba pa mayoria den Parlamento na aña 2018. Esaki ta a pesar cu den conseho na Gobierno, CAFT a papia di un mehoria hopi fuerte, ‘een forse verbetering’, compara cu resultado di aña 2015. E gastonan di aña 2015 tabata mas bou cu e aña anterior y Gobierno a gasta menos di loke a wordo presupuesta. Ademas entradanan di gobierno a mustra un mehoracion compara cu aña 2015. A pesar di e resultadonan positivo na aña 2016 compara cu 2015, Parlamento di Aruba den su mayoria a desaproba e ley aki. Awe e mesun resultado a wordo trata y awor si e la wordo aproba,” Parlamentario Arends a declara.
Pa mas cu 50 aña, Teritorio Insular di Aruba como tambe Pais Aruba, no tabata conoce e finalisacion di e ciclo presupuestatio unda cu Contraloria General ta hasi un investigacion si gobierno a mantene su mes na e fondonan a wordo presupuesta, como tambe e situacion financiero di Pais. Na aña 2011, Gobierno di Aruba, Parlamento y Contraloria General a firma un MOU pa traha hunto pa asina elimina e atraso den e proceso di duna cuenta. Pa dos aña largo expertonan di Departamento di Finansas, Contraloria General y Departamento di Legislation y Asuntonan Huridico a traha den grupo di trabou pa elimina e atraso existente e tempo ey y na mes momento prepara e infrastructura administrativo pa prepara e cuentanan anual. Na aña 2013 a elimina e atraso presupuestario di aña 1986 te aña 2010 y tambe a aproba e cuentanan anual di aña 2011. E ultimo cuenta anual cu a wordo aproba ta di aña 2015. Cu desaprobacion di e cuenta anual di aña 2016 a bin un kibro den e ciclo aki.
E cuentanan anual ta pa duna un bista con gobierno ta gasta e fondonan publico y si a cumpli cu e cuadro fiha den presupuesto. Aprobacion di un cuenta anual ta duna ministernan descarga contabel di nan responsabilidad.
