Parlamentario pa frakshon di MFK, Ramón Yung ta aploudí ku minister di salubridat Javier Silvania ta bai dediká atenshon na e grupo di siudadanonan ku desabilidat, kendenan pa años ta lubidá.
Minister di salubridat Javier Silvania a invitá e grupo di preshon di mayornan ku yunan ku un desabilidat “ARISE” pa un enkuentro, kaminda parlamentario Ramón Yung tambe a forma parti. Parlamentario Ramón Yung anteriormentre komo e úniko parlamentario, a bishitá e enkuentro di e grupo di preshon “ARISE”, kaminda a papia dje diferente preokupashonnan ku ta biba serka e miembronan.
Gerensia di SGR-Groep na tal okashon tambe a hasi menshon dje kantidat di siudadano ku un desabilidat ku ta riba e lista di espera pa por haña alohamentu na un dje sentronan di SGR-Groep i tambe a hasi menshon dje lista di espera di siudadano ku un desabilidat ku ta pendiente pa por haña oportunidat pa por bai un “dag-opvang”.
Durante e enkuentro ku Minister Silvania, un biaha mas e mayornan a ekspresá nan preokupashon, indikando ku mayornan kendenan tin un yu spesial na kas, no ta haña espasio pa por deskansá i relahá maske ta un solo dia òf parti di un dia, komokiera ku no tin espasio pa brinda kuido ni sikiera temporal na esnan ku un desabilidat.
Tambe nan a trese padilanti ku aki na Kòrsou no tin un asina yamá kuido “een op een” pa personanan ku un desabilidat ku ta eksigí e tipo di kuido aki. Personanan ku un desabilidat ku mester haña e kuido spesial aki, mester bai biba entre otro na Ulanda pa nan por bin na remarke pa e tipo di kuido aki. Sinembargo, tin un “defísit demokrátiko” pa loke ta trata petishon pa e kuido aki, pasobra un persona no por apliká pa e kuido aki estando na Kòrsou. Pa e por apliká, e mester bai establesé su mes na Ulanda pa e por hasi esaki.
Banda di esaki, mayornan ku yunan ku un desabilidat ta mustra riba e echo ku den pasado, sr. Stanley Inderson a traha riba lantamentu di e asina yamá “Lei di labizjan”, pero apesar ku a bin ku e lei pa akomodá hustamente e grupo di siudadanonan ku un desabilidat, a kambia e maneho i ta hasiendo uso dje fondo aki pa kubri otro gastunan den sector di kuido.
Mayornan ku un yu ku desabilidat a mustra ku realmente nan no por sigui karga ku e situashon i a sklama na minister Silvania pa sali na interes dje grupo lubidá, di manera ku nan tambe por haña un mihó kalidat di bida.Mirando e situashon doloroso ku mayornan ku un yu ku desabilidat ta pasando aden, Minister Silvania ke yuda pa por yega na solushon dje situashon aki. Minister Silvania próksimamente lo bishitá SGR-Groep tambe kaminda lo papia dje maneho i tambe e situashon entre otro finansiero dje instituto.
Minister di salubridat, Javier Silvania despues lo instituí un grupo di trabou, kaminda lo bai revisá e situashon pa yega na un maneho ku ta mas dirigí i akoplá riba situashon dje siudadanonan ku un desabilidat.
Parlamentario pa frakshon di MFK, Ramón Yung ta kontentu i ta aploudí e posishon asumí pa Minister Silvania, sperando ku pronto huntu ku e grupo “ARISE” lo por yega na adaptashon i òf mehorashon dje kalidat di bida dje grupo di siudadanonan aki.