Parlamentario Ramón Yung: Pashentnan di kanser ta otro grupo lubidá ku meresé atenshon

Na charla “Bida despues di diagnosis” a bin padilanti

Pashèntnan ku a sobrebí kanser òf ku ta sufri di “alopecia” ta sinti ku nan gritu ta manera un gritu den desierto, pasó tin situashonnan sumamente penoso i emoshonal ku nan ta pasa aden, pero ku niun instansia of hende no ta duna atenshon. Parlamentario pa frakshon di MFK, Ramón Yung despues di a asistí na e charla “Bida despues di diagnosis” ta di opinion ku pashèntnan di kanser ta un otro grupo lubidá den nos komunidat, ku sigur meresé atenshon.

Resientemente durante e charla “Bida despues di diagnosis” tabatin un sala kompletamente yen den ouditorio di CMC, konsitiendo di prinsipalmente personanan ku ya a pasa òf ta pasando dor di e proseso pa bringa un of otro tipo di kanser. Tambe tabatin vários persona ku ta sufri di “alopecia” ku ta un malesa ku ta kousa pèrdida di kabei.

Tabatin vários persona ku a duna nan testimonio, indikando kon e pèrdida di kabei sea dor di tratamentu ku kemoterapia, radio-terapia of “alopecia”, ta motibu di un outo-estima abou, perdida di konfiansa propio i tambe di hopi bèrgwensa.

E realidat di bida ta bira aun mas difísil pa enfrentá, momento ku un persona pèrdè un òf ámbos pechu. Debí na e impakto emoshonal, sikológiko, esaki ta kousa un outo-estima hopi abou, e persona no kier ni sikiera wak su mes mas den spil, pasó e no ta rekonosé su mes. Tin kaso den kual e situashon asta a kousa kiebro di famia i ta motibu di hopi “strès” ku depreshon komo konsekuensha.

Pero pa yuda esnan ku a sufri pèrdida di kabei òf ku a pèrdè un òf ámbos pechu, tin diferente forma i téknika ku e persona por keda mantené e mesun apariensha ku kabei, sin ku e mester hasi sirugia. Pa esnan ku a pèrdè un òf ámbos pechu, tambe tin téknika modern di tatuahe 3D Areola. Esnan ku a duna nan testimonio, despues di entre otro a haña yudansa pa mantené e mesun apariensha despues di a sufri perdida di kabei of di a hasi un 3D Areola, a indiká ku nan a bolbe haña konfiansa den nan mes, nan a logra lanta nan outo-estima. E persona ya no tin bèrgwensa mas pa presentá dilanti otro hende, ku asta na su trabou e por presentá sin problema. Pues e proseso pa e pashènt gana su konfiansa propio bèk sigur ta aportá den un proseso di rekuperashon mas rápido, lokual na su turno ta kontribuí den redukshon di entre otro gastunan médiko.

Sinembargo, tin un situashon ku e pashèntnan di kanser aki ta konfrontá. Pasó meskos ku na momento ku un persona pa un motibu of otro pèrdè por ehèmpel parti di su pia, despues di algun tempu e ta bin na remarke pa por haña un “prótesis” di manera ku e por siña kana di nobo i pa e por sigui ku su bida. Den kaso dje pashènt di kanser, apesar ku e parti di kabei ta hunga un ròl asina importante den e proseso di rekuperashon dje pashènt, esaki no ta keda kubrí dor di SVB.

E por zona fásil, esta ku despues di a sufri perdida di kabei e persona por kumpra un peluka i pone esaki riba su kabes. Pero den práktika, esei no ta bai asina fásil. Pasó e kueru di kabes por bira super sensitivo i uso di un peluka di kabei of trahá ku material sintétiko por kousa daño na e kueru di kabes dje pashènt. Pues e material ku ta usa pa traha e “peluka” mester ta unu spesial ku ta permití e kueru di kabes hala rosea, miéntras e kabei tambe mester kuadra ku personalidat dje pashènt. 

Pues dunando e pashènt e oportunidat di por pasa over dje momentunan sikológiko-emoshonal aki, esaki lo kontribuí enormemente den e proseso di rekuperashon ku ta nifiká un periodo ménos largu di tratamentu, pues ménos gastu den e sektor di kuido di e pashènt.

Por keda mira yudansa na e pashèntnan aki komo algu kosmétiko, pero den mayoria kaso debí na e situashon e pashènt pa un termino basta largu mester keda bou di tratamentu di un sikólogo kual lo keda mantené e gastunan den sektor di salubridat haltu.

P’e motibu aki, parlamentario pa frakshon di MFK, Ramón Yung a hasi un petishon na minister di salubridat sr. Javier Silvania pa skucha e doló i preokupashon ku ta biba bou dje pashèntnan di kanser i “alopecia” pa huntu mira di ki manera por aportá na e grupo aki, ku na su turno lo yuda redusí gastu den sektor di salubridat.

Parlamentario pa frakshon di MFK, Ramón Yung ta gradisí minister Javier Silvania pa a honra e petishon aki i ya a programá un enkuentro ku algun representante dje grupo aki, di manera ku proksimamente e por skucha nan doló, pero tambe siña di nan eksperienshanan.