Diabierna ultimo, Parlamento den su constelacion nobo den un reunion publico, a atende cu tres punto di agenda relaciona cu nombracion oficial di miembronan di Gabinete Wever-Croes II. Na e ocasion aki miembro di fraccion di AVP, Ryçond Santos do Nascimento, a mustra riba e tareanan di Parlamento: traha ley y controla. El a mustra cu representantenan di Pueblo tin e responsabilidad y obligacion pa controla cada decision di gobierno, incluso nombracion di minister. P’esey e ta cuestiona e postura di tanto lider di fraccion di MEP como lider di fraccion di RAIZ cu ta neglisha nan tarea di control y ta duna ciegamente nan sosten na ministernan cu formador a propone na Gobernador. Nan no a pidi pa wak niun documento pa sikiera controla pa nan mes cu no tin conflicto di interes of cualkier otro issue cu lo por trece duda den integridad di gobierno. Segun Santos do Nascimento e lidernan di coalicion kier sconde tras di e palabra ‘profesionalismo’, violando di e manera aki nan obligacion profesional di controla y asina violando e profesionalismo cu un parlamentario berdadero mester tin. MEP y RAIZ ta haci comosifuera cu e ministernan a sali for di e proceso di screening ‘met vlag en wimpel’ y sin ningun obhecion sin sikiera mira pa nan mes kico e rapportnan di Veiligheidsdienst, DIMP y OM ta bisa. Nan kier sconde tras di confidencialidad di e documentonan aki, mientras nan sa cu Parlamento por pidi e candidatonan pa minister nan colaboracion pa cu nan Curriculum Vitae y e documentonan cu ta revela nan comportacion fiscal, nan antecedentenan penal como tambe nan posicion pa cu siguridad nacional.
Ta parce cu e fraccionnan cu ta sostene gobierno no ta compronde e funcion di e libertad di expresion, e libertad di prensa y muy en particular e derecho di parlamento pa haci pregunta.
E derechonan aki no ta pa insulta y rebaha otro, pero hustamente pa nos ta critico y cuestiona y controla autoridadnan. Esey ta bo trabou como parlamentario: controla.
Parlamentario Ryçond Santos do Nascimento a enfatisa cu no por tin un confiansa ciego den autoridadnan ni institutonan. P’esey ora cu bo bay cerca hues y bo no ta di acuerdo, bo por bay Corte Superior y si bo no ta di acuerdo cu Corte Superior, bo por bay Casacion y ora cu bo no ta di acuerdo cu Casacion, den cierto instancia bo por bay na nivel internacional. Punto di salido di henter e sistema aki ta un ciudadano ta consciente y critico. Aki parlamentario di AVP a mustra riba un carta fecha dia 28 di oktober 2020 cu ex-Presidente di Parlamento, Ady Thijsen, a dirigi na Gobernado. Den e carta Thijsen ta reconoce por escrito e invalidez di e mocion di desconfianza contra minister Marisol Lopez-Trompa pa motibo di falta di quorum. Ta hustamente pa motibo cu huristanan y expertonan, manera Santos do Nascimento mes, a crea un presion enorme contra ilegalidad di e mocion cu awe nos tin e carta aki caminda señor Thijsen a reconoce cu e mocion nunca a ser adopta. Ta di lamenta cu te awe fraccion di MEP ta keda malinforma Pueblo y ofusca e hechonan. Pero e sucedido ta keda ilustra e importancia pa parlamentarionan tuma tan tarea di controla na serio. Parlamento no mag di firma ningun ‘blanco cheque’ y parlamentarionan no mag di denigra Parlamento den un ‘stempelparlement’.