Lider di partido AVP ayera mainta den un conferencia di prensa extra ordinario convoca, a mustra cu Banco Central di Aruba a publica un rapport cu AVP ta mira cu hopi preocupacion, ya cu ta un rapport cu por mira hopi di inkietud cu AVP a bin ta encontrando den pueblo, ta wordo refleha den cifranan concreto cu Banco Central a midi cerca consumidonan
Parlamentario Mike Eman a mustra cu Aruba ta para na un crusada caminda decisionnan grandi tin cu wordo tuma pa futuro di e pais ya cu tur hende ta sinti cu e pais no por sigui den e direccion actual.
Un gobernacion manera cu e ta wordo hiba, tur dia a afectando mas y mas e confiansa di pueblo, afectando e poder di compra di conciudadanonan, creando hopi tristesa y ta lagando atras un cantidad di famianan, den un posicion sumamente fractura caminda por mira un depresion den e pais,
“E rapport di Banco Central lamentablemente nos ta mira cu e gobierno cu mester comparti esaki cu nos comunidad no ta haci esaki mientrs cu e instituto cu a publica e rapport aki, ta Banco Central di Aruba.
No ta cualkier instituto pero ta un instituto di suma importancia pa pais Aruba, un instituto cu profesionalismo halto, cu obhetividad halto y cu tin man poni tur dia na pols di economia di financia di pais Aruba y logicamente ta midi e sentido di humor, e sentido di sentimento nan cu tin den comunidad y locual Banco Central a midi ta uno sumamente preocupante na e momentonan aki.
E prome parti di e rapport aki cu ta carga e tiulo di ‘Consumer Confidence Survey Report’ di e segundo kwartaal di 2022.
E prome pagina ta mustra e grafieknan y aki laga mustra di biaha akinan cu not a grafieknan cu partido AVP of Mike Eman a traha ya cu cada un di e grafieknan aki, ta bin directamente for di e rapport di Banco Central.
Banco Central su consumer report pa 2022 ta bisa na prome luga, cu 75% di nos comunidad, na e momentonan aki ta sinti cu cada dia cu cosnan ta bay bira mas dificil pa economia y naturalmente tambe pa nan cartera.
No a un cifra chikito, no ta 20 of 30% pero 75% ta spera condicionnan mucho mas malo den proximo periodo segun Banco Central su rapport.
Di dos cifra cu BCA ta alarma p’e, pasobra hopi bes por scucha gobierno bisa cu economia ta recuperando, cu turismo ta drechando y cu tin hopi cupo di trabou pero esunnan cu a wordo entrevista dor di Banco Central, 55% tin expectativa pa nan haya un trabou nobo, ta birando mas dificil.
Pues contrario na locual gobierno ta bisa, sigur Prome Minister cu tur ora ta bisa cu ‘nos tin hopi bon noticia, wel e bon noticia aki ta sumamente tristo.
E di tres cifra ta ainda mas preocupante pasobra e ta mustra con comunidad ya no ta carga speransa mas cu e gobierno cu tin cu maneha e situacion, no tin e situacion bou di control.
BCA ta mustra cu 60% a bisa cu e condicion financiero di gobierno, segun nan ta sinti, unicamente lo empeora den e periodo nos dilanti.
Un 46%, pues practicamente mita di Aruba, ta e inkietud cu nan financia na cas lo bay atras segun e cifranan den e rapport di BCA.
