Ningun gobierno di MEP, a yega di mustra respet no solamente pa pueblo di Aruba den su totalidad pero sigur pueblo di San Nicolas en particular, segun miembro di fraccion di AVP, Mike de Meza ta mustra.
For di 2017 te cu awe 13 di Maart di 2023, gobiernonan di Prome Minister Evelyn Weaver Croes, no a cumpli cu promesanan haci na henter pueblo y tampoco promesanan haci na un desaroyo nobo pa e bario di San Nicolas, sr de Meza ta señala.
“Dado momento bon no por sigui gaña hende y un pueblo di e forma aki, ya cu e berdad ta alcansa e mentira na cualkier momento y pueblo di San Nicolas ya ta na altura cu MEP simplemente no tin plan pa e bario aki.
Ora cu nos scucha Minister di Energia, Glenbert Croes papia di un proyecto pa bin c’un planta di hidrogeno cu lo tin riba tereno di refineria, e ta mustra di tantisimo intento pa manipula henter pueblo di San Nicolas y henter e pais en general.
Pa mustra con tanto Minister Glenbert como su gobierno ta tuma hende haci, ta ora cu el a anuncia su plan pa bin c’un planta di hidrogeno cu mester bin riba tereno di refineria na San Nicolas.
Pues ya aki caba Glenbert ta bolbe dal tanto San Nicolas un tubo, ya cu for di luna di december di 2020, gabinete Wever Croes I a firma un acuerdo cu e companianan di Eagle LNG y Quanten LLC un contract cu RDA pa sigui cu negociacionnan pa mira si ta yega na un acuerdo pa logra reapertura di e refineria.
Dia 14 di Januari di 2021, a firma un acuerdo cu e dos companianan aki un ‘letter of exclusivity’ tambe cu Eagle LNG pa desaroya un facilidad di gas na San Nicolas pero dia 9 di December, a forma un “NO Desclosure Agreement” cu intencionnan totalmente diferente caminda e compania aki lo bay suministra WEB cu gas pero cu ta trata aki un acuerdo caminda pa 20 aña largo lo suministra e planta di awa y electricidad cu gas.
Awe dos aña y tres luna despues, Glenbert Croes ta trata di bende pueblo di San Nicolas y di Aruba algo totalmente diferente, ya cu e ta boga pa Eagle LNG wordo involucra den un posibel planta di hidrogeno cu supuestamente lo bira e proyecto nobo atrobe pa San Nicolas y Aruba.
Awe dia 13 di Maart di 2023, ainda Eagle LNG no a pone un solo dollar den caha di gobierno, no a presenta na Parlamento un plan di inversion y loke ta mas tristo, gobierno mes no a mira e plan aki pero awor Glenbert ta papia di acomoda Eagle LNG den posibel plan nobo pa uzo di tereno di refineria.
Ki dia e mentiranan aki di gobierno MEP-RAIZ a yega na su fin, ya cu simplemente no por sigui manipula cu desaroyo economico di e pais y mucha mas cu e desaroyo economico di e bario di San Nicolas.
Un gobierno mester ta honesto cu su pueblo pero ora cu e falta di respet pa e mesun pueblo aki ta birando asina obvio, e momento ta yegando pa vocifera esaki y mira kico tin cu haci pa evita cu e abuso aki lo continua sin mas,” Parlamentario Mike de Meza a declara.
