Mundialmente nos ta celebra juni como Luna di Orguyo pa comunidad LGBT+. E celebracion anual ta conmemora e Stonewall Riots cu ta marca e comienso di e movemento internacional pa derechonan igual pa esnan cu ta forma parti di un minoria sexual incluyendo lesbiana, gay, bisexual, transgenero etc. Igualdad huridico y di oportunidad pa esnan LGBT+ ta un derecho humano ya caba estableci den mayoria di paisnan avansa.
Aruba su mesun movemento di igualdad pa esnan LGBT+ a cuminsa na 2006 cu e caso Oduber-Lammers, un pareha lesbiana Arubana-Hulandes casa na Hulanda, cu a tuma accion legal pa por registra nan matrimonio localmente. Na 2007 hues a dicta cu Censo/Registro Civil lo mester registra e matrimonio Hulandes di e residentenan Arubano pero e victoria a keda simbolico paso e no a otorga ningun derecho adicional.
Na 2016 ex-Parlamentario Desiree Croes a propone un amienda pa introduci union civil (geregistreerd partnerschap) cu e mesun derechonan di matrimonio pa tanto parehanan di mesun sexo como esnan di sexo diferente. Parlamento di Aruba, cu 11 voto na fabor, a pasa un amienda di consenso creando union civil pero sin e derechonan igual na matrimonio. Aruba su Parlamento tabata e prome organo legislativo den Caribe pa aproba union civil pa parehanan di mesun sexo.
Na 2021, Parlamento di Aruba cu 17 voto na fabor, a aproba implementacion di cambionan na nos codigo civil (burgerlijk wetboek) incluyendo introduccion di union civil. Desde 1 september 2021 parehanan di mesun sexo y esnan di sexo diferente por registra un union civil na Censo pero ambos ta keda falta e mesun derechonan civil cu matrimonio ta otorga. Dia 14 di oktober 2021, pareha van der Biezen-Cordoba, a marca historia como e prome pareha di mesun sexo pa entama un union civil na Aruba, celebracion di e ceremonia oficial a tuma lugar na Stadhuis.
Actualmente parehanan di sexo diferente por scoge entre union civil of matrimonio si nan kier tur e derecho y beneficionan cu e ultimo ta otorga. Sinembargo, parehanan di mesun sexo ta limita na un union inferior sin tur e derechonan di matrimonio como unico opcion asina hancrando discriminacion. Beneficionan incluyendo asuntonan fiscal (impuesto), servicionan social y hopi mas no ta alcansabel pa parehanan den un union civil y herencia por unicamente wordo estableci atraves di un acto notarial.
Na juni 2022 como parti di celebracionnan di Luna di Orguyo, un iniciativa di ley pa habri matrimonio pa parehanan di mesun sexo lo ser presenta. E Miembronan di Parlamento iniciador di e ley lo firma e concepto y entrega e legislacion na Presidente di Parlamento y Griffier. Na e momento ey e trayecto legal lo cuminsa y e concepto lo ser manda inmediatamente pa Raad van Advies cu lo tuma mas o menos seis siman pa evalua y despues duna nan recomendacionnan. Despues, a base di e recomendacionnan di Raad van Advies, e ley por ser modifica y manda bek pa Raad van Advies pa un di dos evaluacion of lo keda na Presidente di Parlamento pa yama un reunion publico pa trata e ley.
Nos ta spera cu prome cu fin di 2022, Parlamento di Aruba lo haya e oportunidad pa debati habrimento di matrimonio pa parehanan di mesun sexo. E cambio historico aki ta uno increiblemente importante pa tur e beneficionan cu e ta trece, specialmente pa e salud fisico y mental di e comunidad LGBT+