ORANJESTAD, Aruba
CFT tabata e prome instancia cu a anuncia cu gabinete Wever Croes lo presenta un presupuesto 2020, yena di mas medida contra pueblo, algo cu fraccion di AVP tambe a bin ta bisando pa hopi tempo caba.
Miembro di fraccion di AVP, sr Michael Lampe ta mustra cu e tipo di desaroyonan aki no ta nada straño of sorpresivo, ya cu desde cu gabinete Wever Croes a huramenta, ningun pero ningun decision a wordo tuma caminda pueblo ta sali beneficia.
Parlamentario Lampe ta mustra cu pa di dos siman sigui, Prome Minister Wever Croes ta habri siman c’un conferencia di prensa caminda e ta trata di ‘blancha’ un bolo den otro intento pa hustifica mas medida cu lo afecta bida di tur ciudadano riba e isla aki.
“Ya Prome Minister no sa mas con pa conta su storianan, no sa mas con pa convence pueblo, cu despues di a ranca mas di 300 miyon caba for di cartera y economia di e pais, ainda e tin mester di 100 miyon florin pa sigui derocha cu su gobierno cu no tin vision pa nada bon.
Ta di tres presupuesto cu e supuesto salbadonan di patria aki ta presenta na pueblo caminda no tin absolutamente nada positivo pa pueblo, caminda ningun caminda por mira cu gabinete Wever Croes, ta bay cumpli c’un solo promesa haci na pueblo durante di campaña electoral.
Ta di tres presupuesto cu pueblo ta haya absolutamente nada for di gabinete Wever Croes y den un forma hopi pober mes, Prome Minister y su gobierno a anuncia aña pasa cu su gobierno a duna pueblo bek den reduccion di ‘loon en inkomsterbelasting’ cu ta suma hunto un reduccion di 16 miyon florin pa pueblo.
Esey pueblo a haya for di gabinete Wever Croes pero di otro banda e mesun gobierno aki a ranca 240 miyon florin for di mesun pueblo aki, pues en realidad no a duna pueblo nada pero absolutamente nada pa drecha e situacion financiero di famianan rond Aruba.
Practicamente por bisa cu Prome Minister y su gobierno ta duna pueblo un aumento di 15 cen pero di otro banda ta ranca 25 florin for di su cartera y esaki ta pone cu e nivel di bida di nos hendenan, ta sigui deteriora bou di maneho di gabinete Wever Croes.
Prome Minister ta bay prensa caminda e ta trata di hustifica loke no tin hustificacion, sigur ora cu pueblo tuma nota cu di un gobierno cu a priminti y sigura tur hende cu lo regla e asunto financiero di e pais sin medida, awor e mesun gobierno aki ta bay den historia politico di nos pais, como e gobierno cu a tuma mas medida contra pueblo di Aruba.
Ya caba a ranca 240 miyon na 2019, supuestamente pa paga proyectonan di PPP pero awor no ta papia mas di mega debe y practicamente no ta mencionando proyectonan di PPP mas sigur mira cu pueblo a haya sa cu a cobra asina hopi pa paga e proyectonan aki, pero no ta bisa kico a haci cu e miyonnan cu a cobra di mas.
Den presupueto 2020 ya caba CFT a mustra cu tin un suma di 110 miyon florin cu ainda gabinete Wever Croes no por hustifica for di unda e ta bay haya e placa aki pero scuchan Prome Minister duna un sermon asina fini y suave, ta mas cu claro cu ta for di cartera di pueblo, comercio y turistanan, lo bay ranca e suma miyonario aki.
Practicamente por bisa cu gabinete Wever Croes a converti su mes den un atracado di cartera di pueblo, caminda no ta tene consideracion cu interes di pueblo, cu interes di e pais ya cu interes di pueblo no ta na prome luga pa Prome Minister y su gobierno,” Parlamentario Michael Lampe a declara.
![Parlamentario Michael Lampe “Den Presupuesto 2020 E Hende No Ta Central Mas”. Cartera Di Gobierno So Ta Central 155 Mrt11 Michael Lampe Cartera](https://www.earubianonews.com/wp-content/uploads/2020/03/MRT11-MICHAEL-LAMPE-CARTERA-800x533.jpg)