ORANJESTAD,Aruba
Tin situacion laboral hopi preocupante na Aruba actualmente, caminda tin indicacion cu varios retiro ta cayendo den diferente negoshi y hasta cu tin negoshi cu no solamente ta reduci nan personal pero ta bay over na cera e negoshi completo.
Drs. Mervin Wyatt-Ras miembro di fraccion di AVP den Parlamento a mustra cu e desaroyo aki tin hopi trahado preocupa y sigur un grupo cu oficialmente a wordo informa cu nan tin cu bay cas, ta un grupo grandi den refineria CITGO.
“Den caso di CITGO tin un desaroyo caminda e trahadonan ta bibando den un incertidumbre grandi ya cu nan no sa kico ta bay pasa y kico lo para di nan, pa motibo cu tin diferente negociacion tumando luga segun por a compronde.
Negociacionnan cu CITGO y otro operadonan cu gobierno y ya caba ta conoci cu CITGO y gobierno ta finalisando e asina yama ‘temporary suspension transfer agreement’ pero riba cual ainda no tin mucho claridad.
Segun por a compronde ta solamente un grupo di 10 trahado lo bay over pa e posibel operado y esaki ta un cantidad hopi abou loke ta lanta e pregunta kico ta bay para di e otro trahadonan.
Tambe por a tuma nota cu prome cu aña a finalisa, CITGO a manda bisa e trahadonan cu for di prome di januari nan no ta ser permiti pa drenta e compania mas y a base di esaki a inicia deliberacionnan.
Sindicato FTA tambe a dirigi carta na CITGO informando e compania aki cu pa falta di informacion y claridad, e trahadonan lo bay den accion di slowdown y cual accionnan mientrastanto a bira accionnan di protesta.
Tur esaki pa motibo cu e deliberacionnan entre gobierno, CITGO y RDA, ta yegando su finalisacion pero no ta informando e trahadonan kico ta bay pasa y si nan ta bay tin futuro cu e e refineria.
Fuera di e incertidumbre aki pa loke ta e aspecto laboral, ningun hende ta na altura kico ta bay pasa cu e “oil terminal” y si tin posibilidad cu trahadonan lo por bay over na drenta servicio di e sector aki y realmente ningun trahado ta na altura di kico ta e situacion berdadero.
Antes bou gobierno di AVP, esunnan cu awe ta Minister den gabinete Wever Croes tabata grita den medionan di comunicacion, caminda nan tabata insisti pa gobierno di AVP informa pueblo kico ta pasando y cu mester sali na defensa di derecho di trahadonan.
Hasta e actual Minister di Labor, sr. Glenbert Croes, tabata organisa protestanan dilanti porta di e refineria caminda entre otro el a sigura tur hende cu ora cu e bira Minister, e lo bay percura pa Arubianonan haya trabou den CITGO.
Awe nos por mira cu na momento cu trahadonan ta bibando den un incertidumbre laboral asina serio, caminda Presidente di FTA hasta a mustra riba e situacion cu lo surgi si trahadonan wordo manda cas, Minister Glenbert Croes, ni su sombra, ta yega den cercania di e tereno di e refineria.
Mientras cu FTA a pone enfasis riba e problemanan social serio cu e retironan aki lo genera, caminda ta kita pan for di mesa di un cantidad di famia, creando incertidumbre financiero y social den e casnan aki, e Minister di Labor ta briyando cu su ausencia y su falta di interes pa sali na vanguardia di trahadonan di CITGO cu algun di nan e mes ta bisa di a duna trabou.
Tur e cosnan aki ta aspectonan cu nos tin cu tuma na cuenta pero ningun hende ta scucha cu gabinete Wever Croes ta bin dilanti pa informa Parlamento, representantenan di pueblo, of ta bay duna cuenta riba e negociacionnan cu ta tumando luga, con lo bay paga e trahadonan?
Tempo cu otro companianan a bay for di Aruba, e companianan aki a duna e trahadonan un cierto suma di placa y a yega na un acuerdo cu nan pero na e momentonan aki ningun hende ta tende kico ta bay pa futuro di e trahadonan, ni for di gobierno.
Ora cu CITGO a establece su mes na Aruba, tur documento concerni, acuerdonan, protocolnan a wordo poni na disposicion di Parlamento caminda tur hende a haya tempo suficiente pa tira bista riba esakinan y asina pone nan mes na altura di kico tabata e acuerdo logra.
E actual ministernan awe a grita e tempo ey cu esey no tabata bon y cu nan mester a haya un copia personal pero awe no tin ningun documento poni na parlamento, no tin ningun copia cu pr wordo haya y simplemente gabinete Wever Croes ta sigui manipula cu interes di trahadonan, interes di pueblo y interes di henter e pais,” Parlamentario Mervin Wyatt Ras a declara.
