Ayera a trata den sala di Parlamento e presupuesto di e fondo di turismo yama Tourism Product Enhacement Fund. Fraccion di AVP apesar di remarcanan riba e presupuesto a sostene dicho presupuesto.
E fondo aki a ser lanta na anja 2010 pa mehora e producto turistico.
Intencion ta mehora e calidad di turismo dor di inversion den e producto turistico riba diferente tereno, manera medio ambiente, seguridad, infrastructura, atraccionnan, cultura y herencia cultural.
Sinembargo por nota durante e ultimo presupuestonan cu e medionan ta ser usa pa proyectonan cu por ser ehecuta dor di otro ministerionan y departamentonan. Ta haci oneigenlijke taken. Esaki ta ser tresi padilanti alabes dor di Raad van Advies.
Segun Wyatt-Ras e forma cu minister a reacciona riba conseho di Raad van Advies ta fresco entre otro pa loke ta trata e aspecto financiero di vorderingen en schulden.
Wyatt-Ras a cuestiona dicon kier pone mas bari di sushi, mientras alabes ta necesario concientisacion. Dicon kier bin cu concientisacion rond recyclage mientras esaki lo mester cai bou of den cooperacion cu otro departamento.
Tambe el a elabora encuanto e problema di cacho. E ta trese padilanti cu e ta stima cacho y su partido a entrega e ley pa proteccion di cacho y otro animalnan. E suma no ta suficiente y otro departamentonan mester por carga nan responsabilidad pa atende cu e proteccion di nos animal nan.
Wyatt-Ras ta haya ademas necesario y urgente pa drecha careteranan cu turistanan tin cu core desde aeropuerto pa yega nan camber di hotel. Especial e area di Bubaliplas. Aki yobida ta causa cu awa di e plas ta core y keda para riba caya y kibra tur e camindanan den vecindario.
A puntra minister riba su vision a largo plaso y cooperacion cu otro instancia y stakeholders pa mehoracion efectivo di nos producto Aruba. Esaki ta necesario en bista cu nos tin cu concuri cu otro paisnan entre otro den Caribe pa por keda competente den atraccion di turistanan.
A pidi pa cuentanan annual di e anjanan 2020-2021 y a enfatisa cu ta necesario pa Parlamento ricibi relatonan pa haci su trabou di control di gobierno na un forma efectivo. Gobierno mester contesta preguntanan di Parlamento y trata Raad van Advies na un forma respectuoso den su reacionnan.
El pa papia tambe di e valor di turismo medico pa aumenta ingreso di nos pais y a puntra si a keda cla cu acreditacion. Minister a purba ganja cu Wyatt-Ras a bagatalisa profesionalnan. Wyatt-Ras a coregi’ den persoonlijk feit y den vraag punt pa e minister stop di ganja, paso ta representantenan di e entidadnan a trece dilanti den Parlamento cu falta acreditacion, pesey e Parlamentario ta follow up.
Wyatt-Ras a papia alabes di nos reputacion cu ta un aspecto importante pa nos como producto turistico ta nos reputacion. E ta menciona con vacunagate por afecta esaki. Wyatt-Ras ta menciona cu tin bisa cu ta trata di 3000-4000 vacuna, aunke minister ta bisa ta entre 800-900 vacuna y e ta huy pa su responsabilidad, bisando biaha pas cu e caso ta sera. Pesey prome cu punta dede riba otro, mester wak su mes. A pidi pa e minister informa tocante e caso aki.
Finalmente e Parlamentario a expresa su preocupacion pa cu confiansa den nos pais y influencia ariba nos hendenan y turismo dor di e forma con e gobierno aki, manera flie sin rabo, ta traha. Tambe e forma con e minister presidente, kende no por mira un pen, ta firma continuamente pa corta garganta di nos pueblo y tin nos pueblo na rudia. Ela firma e landspakketten y asina bai di acuerdo cu lo bin un ley di COHO Y RAft, mientras cu awor cu COHO ta “zogenaamd” van tafel geveegd lo e firma un “onderlinge regeling”. Aki atrobe e ta bai compromete nos pais cu mas medida. Ya caba dor di tur medida cu a tuma dor cu e ministro presidente aki a palabra esakinan cu Hulanda sin consulta ni cu gremio ni cu pueblo, nos hendenan ta sintiendo esakinan. Nos ciudadanonan no por paga nan medicina, no por paga nan cuentanan y no por pone ni pan ariba mesa di nan famia. Consecuencianan ta e.o. aumento di criminalidad, problemanan social y di salud mental. Con nos pueblo por ta contento e ora pa ricibi bishita di turista? Con happy nos pueblo ta? Wyatt-Ras ta pidi pa duna atencion na e aspecto aki y refleha, e.o. pa medio di investigacion y seminario.