Durante conferencia di prensa di partido y fraccion di AVP, Parlamentario drs. Mervin Wyatt-Ras a trece su punto di bista padilanti pa loke ta trata 100 dia di e gobernacion aki.
Un gobernacion cu segun Wyatt-Ras te ainda solamente a drumi y fiesta. Ta bisto segun e parlamentario cu ningun accion o sea ningun stap a ser tuma pa alivia situacion di nos ciudadanonan. Esaki despues cu den campanja un cantidad di promesa a ser haci.
Pa ta mas concreto por menciona cu den 100 dia di gobernacion, gobierno te ainda no por a presenta un presupuesto pa anja 2022. E presupuesto aki mester a ser entrega na Parlamento ya caba prome cu 1 di september di anja 2021. Gobierno tampoco no a presenta un jaarrekening di diferente ajanan anterior. Tampoco gobierno a aproba e Landsverordening Instelling Ministeries pa reglamenta e tarea di diferente ministers den diferente ministerionan. Mientrastanto e ministers ta keto sin ta tuma ningun accion pa remedia of mehora situacionnan.
Por constata cu enbes cu ministernan ta tuma responsabilidad den nan trabou, nan ta sinta warda Hulanda dicidi su next step. Esaki despues cu na anja 2019 minister presidente a firma e landspaketten comprometiendo nos pais y acordando medidanan severo riba lomba di nos pueblo. Tin di e ministernan a tuma vakantie prome cu a cuminsa traha ya cu no tin nada di haci. Otro a festeha hasta dia di tres rey tirando pagara contra di ley cu nan mesun coalicion a stipula.
E blunder di mas grandi ta minister presidente cu mester tin un “voorbeeldfunctie”. Na momento cu nos pais a ser confronta cu e prome casonan di Omicron, dia 20 di december anja pasa, el a pone fiesta grandi pa celebra matrimonio di su yiu, a baila y gosa. Tambe a permiti diferente otro fiestanan grandi di nan friends and family. Asina a yuda transmiti e virus contagioso grandemente. E casonan di Omicron a aumenta asina hopi cu ya dia 28 di december nos pais a drenta e di cinco Wave di COVID-19 y despues CDC a pone nos pais riba lista corra cu conseho negativo pa turistanan bin pasa vacacion na Aruba. Aki no tabatin ningun minister den e minsterraad cu por a coregi e ministro presidente aki y otro coleganan, incluyendo e minister di Salubridad, cu a tuma un postura slap. Asina mas den e gobierno aki a fiesta sin preocupa pa otro y awor sin paga pa e consecuencia financiero y laboral di nan actonan. Ta netamente e prome minister aki mester duna ehempel, e tin un “voorbeeldfunctie”, paso e ta esun cu ta bin bisa cuidadanonan pa no fiesta of bai night club. Ta sorry pero bo yiu por casa, bo casa por haci anja, pero no por celebra. Abo mester duna ehempel, pero tur ta na sonjo y e minister di salubridad ta slap y no ta coregi. Net awor cu a elimina FASE promer cu fin di anja y cu nos hendenan no por bin na remarca mas pa pakete di cuminda via di Rode Kruis dor di cual hopi di nos hendenan no por pone pan ariba mesa di nan famia, nos ta haya nos confronta cu esaki.
Den 100 dia gobierno no a tuma stap concreto pa elimina probresa. Pobresa a bira hasta mas grandi. Enbes di yudansa pa esnan den dificultad gobierno lo bin cu medidanan entre otro riba tereno di cuido. Criminalidad den nos pais tambe ta creciendo. Casonan di abuso di mucha y saud mental ta subiendo na gran escala sin cu e listanan di espera pa haya yudansa a baha y sin cu e ley di proteccion contra abuso di mucha cu cambio di 5 regel a pasa.
Ademas gobierno tin problema cu tur hende. E tin problema cu Hulanda. Gobierno di Aruba a ganja nos pueblo cu ta Hulanda ta impone medida den cuido, mientras ta e ministro presidente cu ayudo di minister di salubridad a duna Hulanda idea pa corta 60 miyon den cuido. Awor cu pueblo no ta acepta, ministro presidente kier cambia e palabracion aki cu Hulanda pero no por, paso pa Hulanda “afspraak is afspraak”. Gobierno tin problema tambe cu ambtenaarnan y sindicatonan. A kita 12.6% for di salario di ambtenaarnan sin consulta y awor aunke a elimina FASE no kier duna ambtenaarnan un salario completo. Ademas ta pone condicionnan inacceptable pa sindicatonan sinta na mesa. Un otro problema ta esun di e minister di salubridad cu e director di Hospital. Aki enbes di sinta na mesa cun’e ta sundra den prensa.
Pa loke ta trata proyectonan, tin cu menciona cu diferene proyecto a keda para y no tin prioridad di e gobierno na sonjo y fiestando, manera Serlimar cu ta den bancarota, nada no a wordo haci. Parkietenbos nada no a wordo haci. Pa loke ta trata Hospital nada no a wordo haci pa finalis’e. Waterzuiveringsinstallatie Bubali serca di hotelnan y beachnan, nada no a ser mehora.
E unico ta e proyecto cu a anuncua di LNG cu lo mara nos pais pa 20 anja financieramente, cu lo duna solamente 20 hende trabou, sin garantia di baha prijs di awa y coriente. E proyecto aki lo tin consecuencianan desastroso e.o. pa nos medio ambiente, dor di e tubonan di gas cu lo pasa di San Nicolaas bai WEB riba tera. A nenga di duna Parlamento e contract, mientras ministernan a nenga cu nan a mira esaki. Pues por conclui cu e gobierno aki den su prome 100 dia, enbes di traha, a drumi y fiesta sin haci nada pa nos pueblo.
