Nos hendenan ta buskando trabou (aktivamente) hopi biaha, mayoria bes esakinan ta pèrsonanan entre 15 i 64 aña. Desempleo ta relativamente mirá mas haltu bou di personanan di 25-34 aña i 35-44 aña ku bou di personanan den e otro kategorianan di edat. Kòrsou aktualmente konosé un porsentahe di 24,3% desempleo i 42,2% bou di hubentut.
Personanan ku ta buskando trabou ke traha prinsipalmente den e industrianan ‘hotèl i restorant’, ‘konstrukshon’, ‘benta por mayor i detal’, ‘reparashon di vehíkulonan motorisá’, ‘hür di vienes móbil’ i otro ‘servisionan empresarial’ i ‘salubridat i servisionan sosial’.
Tumando nota riba e último desaroyo rondó di kuponan di trabou nobo ku a habri den e sektor di hospitalidat, turismo i horeka, Parlamentario Gwendell Mercelina, Jr. a skucha tambe prekupashon serka algun di nos suidadanonan. Riba e sektor laboral nos mester por kumpli i informá mihó riba nos deber i derechinan di nos profeshonalnan i solisitantenan.
Invershonista hotelero Sandals Resorts di sinku strea a bini i ya kasi ta ‘full booked’ ku reservashon pero ainda ta buskando personal lokal pa traha i a hasi sondeo pero no ta kedando kla pa yena su mas ku 800 kuponan di trabou ku trahadónan lokal. I si no yena esaki, lo mester habri e kuponan pa estranheria.
P’esei Parlamentario Mercelina ke hasi un petishon spesial, i ta deseá di tin mas informashon di solisitantenan ku ta pasando den proseso di solisitut sin keda kla na informashon nesesario òf tin poko perspektiva, òf ku tambe ta notando e fenómeno akí ku mester di mas investigashon. Den e kuadro aki tambe tumando nota ku den e sektor aki e aktornan prinsipal mester tuma un ròl mas fundamental manera un HORECAF, CHATA, Inspekshon di Labor, etc.
