Resientemente Parlamentario mr. Giselle Mc William di Frakshon di MAN a bishitá SEFBA ku ta enkargá ku maneho di Gobièrnu pa ku barionan. Manera ta konosí Parlamentario mr. Mc William resientemente fuertemente a ekspresá su mes pa trese kambio pa ku maneho di barionan i ku e pa años tur gobièrnu di turno no atendé ku esaki manera mester ta. Sentro di Barionan no ta duna e resultado duradero ku nos mester pa por yuda edifiká nos hendenan atrabes di un maneho duradero.
Den kuadro di esaki Parlamentario mr.Mc Wiliam di Frakshon di MAN a proponé algun tempu pasa pa bini ku konsehonan di bario unda habitantenan por skohe nan nan representantenan den e konseho di barionan. Un proposishon ku for di añanan 90 sr dr. Don Martina di MAN a lansa komo proposishon den Eilandsraad. Kreando konseho di barionan di un manera transparente pero tambe e igualdat den tur barionan pa empoderá nos hobenan, mama solteronan, famianan i krea barionan úniko òf barionan mágiko manera ta e soño di Parlamentario mr.Mc William. SEFBA ku ta e organisashon apuntá pa gobièrnu, tambe ta di pensamentu ku mester un kambio den strukturanan di sentro di barionan pa asina yega na un maneho duradero ku e fondonan nesesario pa empoderá nos barionan riba tur nivel. Di e manera aki sentralisá e diferente aktividatnan den barionan krea efisiensia ,data i midi resultado.
